قائیمقامیەتی سلێمانی بڵاویکردەوە، لەگەڵ لایەنە پەیوەندیدارەکان کۆبووەتەوە و باسیان لە وردەکاری چارەسەرکردنی کێشەکانی گواستنەوەی خوێندکاران کردووە و پێشنیارکراوە لە رێگەی ئەپڵیکەیشنێکەوە لەناو موبایلدا دایکان و باوکان و ئیدارەی خوێندنگاکان ئاگاداری کات و چۆنێتی گواستنەوەی خوێندکارەکان بن.
قائیمقامیەت دەڵێت، “کۆبوونەوەکە لە نێوان قائیمقام و بەڕێوەبەری گشتیی پەروەردە و بەڕێوەبەری پەروەردەکانی رۆژهەڵات و رۆژئاوا و بەڕێوەبەری گواستنەوە و چاودێری بازرگانی و نوێنەری ئاسایش و هاتوچۆ و لیژنە هاوبەشەکان بەڕێوەچوو و لە کۆبوونەوەکەدا وردەکاری گواستنەوەی خوێندکاران لە ماڵەوە بۆ ناوەندەکانی خوێندن و بەپێچەوانەوە باسکران”.
ئاماژە بەوەشکراوە، لە بەشێکی کۆبونەوەکەدا باس لەچۆنێتیی بەکارهێنانی تەکنەلۆژیا کرا بۆ ئاسانکاری پرۆسەکە و پێشنیارکرا لە رێگەی ئەپڵیکەیشنێکەوە لەناو مۆبایلدا دایکان و باوکان و ئیدارەی خوێندنگاکان ئاگاداری کات و چۆنێتی گواستنەوەی خوێندکارەکان بن، بۆ ئەوەی مامۆستایان و دایکان و باوکان دڵنیابنەوە لە سەلامەتیی گواستنەوەی خوێندکارەکان.
