قائیمقامیەتی قەزای دەربەندیخان رایدەگەیەنێت، گەڕان بە شوێن تەرمی گەنجێكی قەزاكە لە دەریاچەی دەربەندیخان بەردەوامە.
بەپێی راگەیەندراوێكی قائیمقامیەتی قەزای دەربەندیخان كە وێنەیەكی دەست تۆڕی میدیایی ئێستا كەوتووە و تێیدا هاتووە، لە دوای ئەوەی شەوی رابردوو لە نزیك گوندی عازەبان لەسەر دەریاچەی دەربەندیخان بەهۆی وەرگەڕانی بەلەمەكەیانەوە سێ گەنج كەوتنە ناو ئاوی دەریاچەكە و بووە هۆی خنكانی گەنجێكی شاری دەربەندیخان و دوو گەنجەكەی دیكە بە مەلەكردن رزگاریان بوو.
لە راگەیەندراوەكەدا هاتووە، لە دوای ئاگاداربوون لە رووداوەكە تیمەكانی بەرگریی شارستانی و ژێرئاوگەڕ (غواس) چوونە شوێنی ڕووداوەكە و پرۆسەی گەڕان بە دوای تەرمی گەنجەكەدا بەردەوامە، بەڵام بەداخەوە بەهۆی قوڵی زۆری شوێنەكە تائێستا نەتوانراوە تەرمەكە بدۆزرێتەوە.
