فەرمانگەی میدیا و زانیاری ڕایگەیاند، بەهۆى بەرزبوونەوەى نرخى نەوت و ڕێکخستنەوەى داهاتى ناوخۆ و کەمکردنەوەى خەرجى، بەرە بەرە حکومەتى هەرێمى کوردستان خۆى لەو قەرزانەى کەلەسەرى کەڵەکە بووە دەرباز دەکات.
فەرمانگەی میدیا و زانیاری، ئەمڕۆ سێشەممە ڕایگەیاند، ” حکومەتی هەرێم لە سێ مانگی دووەمی ئەمساڵ، زیاتر لە دوو هێندەی سێ مانگی یەکەمی ساڵ، قەرزی ساڵانی پێشووی کۆمپانیا نەوتییەکانی داوەتەوە کە بڕەکەی 422 ملیۆن و 465 هەزار و 576 دۆلارە”.
ئاماژەی بەوەشکرد، “لە سێ مانگی یەکەمی ئەمساڵ (٢٠٦.١٠٤.٦٢٦) 206 ملیۆن و 104 هەزار و 626 دۆلار قەرزدراوەتەوە، لە سێ مانگی دووەمیش422 ملیۆن و 465 هەزار 576 دۆلار بووە”.
ئاشکراشیکرد، ” لەماوەى ڕابردوودا حکومەتى هەرێمى کوردستان بەهۆى نەناردنى شایستە داراییەکانى لەلایەن حکومەتى عێراقەوە تووشى قەرزێکى زۆر بویەوە، بەڵام بەهۆى بەرزبونەوەى نرخى نەوت و ڕێکخستنەوەى داهاتى ناوخۆ و کەمکردنەوەى خەرجى، بەرە بەرە حکومەتى هەرێمى کوردستان خۆى لەو قەرزانەى کە لەسەرى کەڵەکە بووە دەربازدەکات”.
