وتەبێژی بەڕێوبەرایەتیی بەرگریی شارستانی دهۆک، ئەمڕۆ یەکشەممە 17ی کانونی دووەم ڕایگەیاند کە ئاگر لە کەمپێکی ئاوارەکانی پاڕیزگای دهۆک کەوتووەتەوە و تەنها زیانی مادی هەبووە.
لە لێدوانێکدا بۆ تۆڕی میدیایی ئێستا، بێوار عەبدولعەزیز وتی، “پاشنیوەڕۆی ئەمڕۆ لە کەمپی باجد کەنداڵی سەربە پارێزگای دهۆک ئاگر کەوتووەتەوە و بەهۆیەوە چوار خێمەی ئاوارەکان بەتەواوی سوتاوە و زیان بەر حەوت خێمەی دیکە کەوتووە”.
وتەبێژی بەڕێوبەرایەتیی بەرگریی شارستانیی دهۆک ڕاشیگەیاند کە ئاگرەکە هیچ زیانێکی گیانیی نەبووە.
سەبارەت بە هۆکاری ئاگرەکەش وتی، ئاگرەکە بەهۆی کێشە لە کارەبا و شۆرتی کارەبا بووە.
بەپێی وتەی بێوار عەبدولعەزیز لە سەرەتای مانگی یەکی ئەمساڵەوە واتە لە 17 ڕۆژی ڕابردوودا ئەمە سێیەم حاڵەتی ئاگرکەوتنەوەیە لە کەمپی ئاوارەکانی دهۆک و هۆکاری سەرجەمیشیان شۆرتی کارەبا بووە.
