وەفدێكی وەزارەتی كشتوكاڵ و سەرچاوەكانی ئاوی هەرێم، بە سەرۆكایەتیی بێگەرد تاڵەبانی وەزیری كشتوكاڵ و بە هاوڕێیەتی كەریم سلێمان بریكاری وەزارەت و دارەوان حاجی حامید نوێنەری حكومەتی هەرێم لە ئیسپانیا و پورتوگال، لەگەڵ میریام فۆرتێس كوینتانیلا سەرۆكی ژووری بازرگانیی هەرێمی مورسیا كۆبوونەوە.
لە كۆبوونەوەكەدا گفتوگۆ دەربارەی چۆنییەتی پەرەپێدانی هەماهەنگییەكانی نێوان هەرێمی كوردستان و هەرێمی مورسیا، لە بواری پەیوەندیی ژوورە بازرگانییەكان و كۆمپانیاكانی وەبەرهێنانی كشتوكاڵی و ئاودێری كرا.
لەبەشێكی تری دیدارەكەدا هەردوولا جەختیانكردەوە لەسەر ئەنجامدانی كۆنفڕاسێكی هاوبەش بەناوی (كۆربەندی ئابووریی ئیسپانیا – كوردستان) بۆ هەمان مەبەست و بڕیارە وەفدێكی ژووری بازرگانی و وەبەرهێنانی مورسیا سەردانی هەرێم بكەن، بە ئامانجی ئامادەكاری و رێكارەكانی دەستپێكردنی كۆربەندەكە.
