بارستە هەوایەکی سارد لە ناوچەکانی رۆژهەڵاتی ئەوروپاوە هاتووە روو لە عێراق دەکات و پلەی گەرمی لە نێوان سێ بۆ حەوت پلەی دیکە دابەزین بەخۆیەوە دەبینێت.
دەستەی کەشناسیی عێراق بڵاویکردەوە، بەهۆی ئەو شەپۆلە سەرما و دابەزینی پلەی گەرمییەی روو لە عێراق دەکات، ئەگەری بارانبارین لەناوچەکانی هەرێم و ناوچەکانی دیکەی عێراقیش دەبێت.
عامر جابری، بەڕێوەبەری راگەیاندنی دەستەکە باسی لەوەکردووە، ناوچەکانی ناوەڕاستی عێراق و هەرێمی کوردستان دەکەوێتە ژێر کاریگەری راستەوخۆی شەپۆلەکە بەهۆی ئەوەی پلەی گەرمی بەشێوەیکی بەرچاو دابەزین تۆمار دەکات، ناوچەکانی باشوور کەمتر پلەی گەرمییان دادەبەزێت.
ئاماژەی بەوەشکردووە، ئەگەری هەورەبرووسکە و بارانبارین لەناوچەکانی باکوور ئەگەرێکی بەهێز دەبێت و خێرایی با زیاددەکات تا رادەی گەیشتنی بە 40 کیلۆمەتر لە هەر کاتژمێرێکدا.
