لەگەڵ بڵاوبوونەوەی جۆرێکی دیکەی ڤایرۆسی کۆرۆنا بەناوی “زنجیرەی دەلتا” وەزارەتی تەندروستیی هەرێم ڕایگەیاندووە، پێداویستیان بۆ دەنستنیشانکردنی ئەو جۆرەی ڤایرۆسی کۆرۆنا دابینکردووە.
ڤایرۆسی دەلتا کۆرۆنا هاوشێوەی ئاگر لە وڵاتانی جیهاندا بڵاودەبێتەوە و ڕێکخراوی تەندروستیی جیهانییش دەڵێت، مەترسییان هەیە لە بڵاوبوونەوەی خێرای زنجیرەی گۆڕاوی دەلتا کۆرۆنا، ڕاگرتنی بڵاوبوونەوەی کۆڤید – 19 بە ڕێگایەک بۆ ڕاگرتنی سەرهەڵدانی زنجیرەی نوێ دادەنێت.
سامان بەرزنجی، وەزیری تەندروستیی حکومەتی هەرێم لەبارەی دۆخی بڵاوبوونەوەی ڤایرۆسی کۆرۆنا ڕایگەیاندووە، ” پێشبینی هەڵکشانی سێیەم و ئەگەر و گومانی بڵاوبوونەوەی جۆر و زنجیرەی نوێی ڤایرۆسی کۆڕۆنا دەکەین، وەزارەتی تەندروستی ئامادەکاری زیاتری ڕوبەڕوبوونەوەی هەر هەڵکشانێکی نوێ دەکەین”.
وەزیری تەندروستیی هەرێم داوایەک لە هاوڵاتییان دەکات و دەڵێت، “تکایە بەرزبوونەوەی ئامارەکان بەهەندی وەربگرن و ڕێکاری خۆپارێزی بگرنە بەر بە پۆشینی ماسک و دوورکەوتنەوەی کۆمەڵایەتی و قەرەباڵغی، ئاگاداری خۆتان و خانەوادە و منداڵەکانتان بن با هەموومان هاوکار و پاڵپشت بین و ڕێگەبگرین لە هەڵکشانی توندی نەخۆشیەکە و کوردستانمان بپارێزین”.
لەبارەی پڕۆسەی ڤاکسینەوە وەزیری تەندروستیی هەرێم ئاماژەی بەوەکردووە، ” پڕۆسەی پێدانی ڤاکسین پێشووەچوونی بەخۆوە بینیوە، زیاتر لە 399 هەزار ژەمەڤاکسینی دژەڤایرۆسی کۆڕۆنا لەلایەن دانیشتوانی هەرێمی کوردستان وەرگیراوە، لەوانە زیاتر لە 255 هەزار هاوڵاتی کە دەکاتە ڕێژەی لەسەدا (7.8%)ی ئامانج ژەمی یەکەم و زیاتر لە 144 هەزار هاوڵاتی کە دەکاتە ڕژەی لەسەدا (4.4%) ی ئامانج ژەمی دووەمی ڤاکسینی دژەڤایرۆسی کۆڕۆنای وەرگرتووە”.
زنجیرەی کۆرۆنای هیندی کە بە “دەلتا” ناسراوە بەڕێژەی 40% بەهێزترە لە زنجیرەی ئەلفا کە سەرەتا لە بەریتانیا سەریهەڵدا، بەپێی توێژەرانی فەرەنسی زنجیرە نوێیەکە بەڕێژەی 50% بۆ 80% خێراتر دەگوازرێتەوە.
زنجیرەی نوێی کۆرۆنا “دەلتا” بۆ یەکمجار لە هیندستان سەریهەڵدا و لە مانگی نیساندا بڵاوبووەوە، ئێستا لانیکەم لە 85 وڵاتی جیهان بوونی هەیە بەڕێژەی جیاواز.
