وەزارەتی گەنجینەی فیدڕاڵیی ئەمریکی رایگەیاند، وڵاتەکەیان سزاکانی سەر کەرتی نەوت و پتڕۆکیمیایی ئێرانی فراوانتر کردووە، ئەوەش وەک کاردانەوەیەک بۆ هێرشە مووشەکییەکانی تاران بۆ سەر ئیسرائیل.
وەزارەتی گەنجینەی ئەمریکا باسی لەوەکردووە، ئەم رێوشوێنە رێژەی فشاری دارییەکانی سەر ئێران زیاددەکات، هاوکات، توانای وڵاتەکە بۆ بەکارهێنانی ئەو داهاتانەی لە سەرچاوە گرنگەکانی وزە بەدەستی دەهێنێت بۆ تێکدانی سەقامگیریی ناوچەکە و بە ئامانجگرتنی هاوپەیمانەکانی ئەمریکا کەمدەکاتەوە.
ئەم بڕیارە کەرتی نەوت و پترۆکیمیایی کە کەرتە سەرەکییەکانی ئابوری ئێرانن دەکاتە ئامانج و دەیانەوێت، حکومەتی ئەو وڵاتە لەو سەرچاوە داراییانەی کە بۆ پشتیوانی لە بەرنامە ئەتۆمی و مووشەکییەکانی بەکاری دەهێنێت بێبەشبکەن.
هاوکات وەزارەتی گەنجینەی ئەمریکا، 16 قەوارە و 17 کەشتی بەهۆی بەکارهێنانیان لە گواستنەوەی نەوتی ئێران و بەرهەمە پترۆکیمیاییەکانی ئێران بۆ پشتیوانی لە کۆمپانیای نیشتمانیی نەوتی ئێران، وەک موڵکی قەدەغەکراو پۆلێن کردووە.
