وتەبێژی وەزارەتی دەرەوەی ئەمریکا رایگەیاند، لە رێگای کۆمسیۆنی باڵای هەڵبژاردنەکانەوە چاودێریی هەڵبژاردنی پەرلەمانی کوردستان دەکەین.
ماتیۆ میلەر وتەبێژی وەزارەتی دەرەوەی ئەمریکا لە لێدوانێکی رۆژنامەوانیدا رایگەیاندووە، بۆ چاودێریکردنی هەڵبژاردنەکانی پەرلەمانی کوردستان لەگەڵ کۆمسیۆنی باڵای سەربەخۆی هەڵبژاردنەکان هەماهەنگی دەکەن.
ئاشکراشیکردووە، پشتگیری لە هەر هەوڵێک بۆ گەرەنتیکردنی هەڵبژاردنێکی ئازادانە و پاک دەکەن.
بڕیارە لە 20ی ئەم مانگە هەڵبژاردنی خولی شەشەمی پەرلەمانی كوردستان بۆ هەڵبژاردنی 100 ئەندام لەنێو هەزار و 191 كاندیددا بەڕێوەبچێت.
بەپێی ئامارەكانی كۆمسیۆن دوو ملیۆن 899 هەزار و 578 کەس لە هەرێمی کوردستان مافی دەنگدانیان هەیە.
دابەشكردنی 100 كورسییە گشتییەكانی پەرلەمانیش بەپێی بازنەی پارێزگاكان بەمجۆرەیە، (هەولێر 32، سلێمانی 36، دهۆك 24 و هەڵەبجە سێ كورسی) جگە لە (هەولێر دوو، سلێمانی دوو و دهۆك یەك كورسی) تایبەت بە پێكهاتەكان.
بۆ هەڵبژاردنەكە لەلایەن كۆمسیۆنەوە تا سێشەممەی داهاتوو 15ی تشرینی یەكەم بە وادەی بانگەشە دیاریكراوە.
