کۆمسیۆنی هەڵبژاردنەکانی عێراق داوادەکات، “بانگەشەی هەڵبژاردن دووربێت لە توندوتیژی و رق و کینەو زیانگەیاندن بە لایەنی بەرامبەر”.
کۆمسیۆنی باڵای سەربەخۆی هەڵبژاردنەکانی عێراق لە بەیاننامەیەکدا رایگەیاند، “لەگەڵ نزیکبوونەوە لە رۆژی دەنگدان، کۆمسیۆن داوا لە حزبە سیاسییەکان، هاوپەیمانییەکان و پاڵێوراوانی بەشدار لە پرۆسەی هەڵبژاردن دەکات کە پاڵپشتیی کارەکانی کۆمسیۆن بکەن و بەشداربن لە سەرکەوتنی هەڵبژاردنەکان، ئەمەش، لە رێگای پابەندبوون بە رێساکانی رەفتاری هەڵبژاردن و مەرج و بنەماکانی پەیڕەوی هەڵمەتەکانی هەڵبژاردن کە کۆمسیۆن دایناون بەگوێرەی پەیڕەوی هەڵمەتەکانی هەڵبژاردن ژمارە دووی ساڵی 2023”.
دەشڵێت، کۆمسیۆن هیواخوازە کە هەڵمەتەکانی هەڵبژاردن، تا رۆژی دەنگدان و راگەیاندنی ئەنجامە کۆتاییەکان، ئەو بیرۆکانە لەخۆنەگرێت کە هاندەرن بۆ توندوتیژی، رق وکینە، یان سووکایەتیکردن یان زیانگەیاندن بە کاندیدەکانی تر و حزبە کێبڕکێکارەکان.
لە بەیاننامەکەدا هاتووە، لە هەمان کاتدا کۆمسیۆن داوادەکات کە رێگا یاساییەکان بگیرێنەبەر لە پێشکەشکردنی سکاڵا و تانەدان و دوورکەوتنەوە لە کار و کاردانەوەی نێوان کێبڕکێکاران، هەروەها، بەپێی ئەو پەیڕەو و میکانیزمانەی کۆمسیۆن دایناون و بەوپەڕی بێلایەنی و سەربەخۆییەوە سەیری ئەو سكاڵا و تانانە دەکرێن کە پێشکەشکراون.
