نرخی کانزای زێڕ لە بەرزبوونەوە بەردەوامە، بە جۆرێک نرخەکەی نۆ هێندە بەرزبوونەوەی تۆمارکردووە بەراورد بە ساڵی 2000 و سێ هێندە و نیوی ساڵی 2010یە و دوو هێندەی ساڵی 2017یە.
ئەمڕۆ نرخی کیلۆیەکی هاوتای 84 هەزار و 534 دۆلاری ئەمریکییە و گرامێکی کانزاکە هاوتای 84 دۆلار و 53 سەنتە.
لە بازاڕەکانی هەرێمی کوردستانیش، نرخی مسقاڵێک زێڕی عەیاری 21 هاوتای 565 هەزار دینار و مسقاڵێک زێڕی عەیاری 24 بە 645 هەزار دینارە و مسقاڵێک زێڕی عەیاری 18 بە 485 هەزار دینارە.
کانزا زەردەکە، خواستێکی زۆری جیهانی لەسەرە ئەوەش وایکردووە، لە زۆرینەی وڵاتانی جیهانی بە وڵاتی خۆشمانەوە، کڕین و ئامادەکردن و پێشکەشکردنی کانزاکە لەلایەن هاوسەرەوە بۆ هاوژینەکەی، وەک بەشێک لە پڕۆسەکە دادەنرێت و تەماشادەکرێت، هەر بۆیە بەرزبوونەوەی نرخی زێڕ کاریگەریی لەسەر کۆی گشتیی پڕۆسەکە کردووە و لەماوەی چەند ساڵی کۆتاییدا، کڕینی بڕی کانزاکە بەهۆی نرخەکەیەوە کەمبووەتەوە.
لە بەرامبەر ئەو کەلتورەی وای کردووە، کڕینی زێڕ وەک بەشێک لە پێداویستییەکانی هاوسەرگیری تەماشابکرێت، بەشێک لە خەڵکی پێیان وایە، دەکرێت مەرجی کڕین زێڕ و ئەو بارگرانییە زۆرە لەسەر هاوسەران هەڵبگیرێت، یاخود دەکرێت بە شتێکی دیکە لە نمونەی کانزایەکی دیکەی جوانکاری و خشڵ، بارگرانییەکە کەمبکرێتەوە.
