لە کۆبوونەوەی ئەمشەوی ئەنجومەنی پارێزگای کەرکوک کە لە شاری بەغداد بەڕێوەچوو، بە زۆرینەی دەنگی ئەندامانی ئەنجومەنەکە رێبوار تەها وەک پارێزگاری نوێی شارەکە هەڵبژێردرا.
رێبوار تەها مستەفا ئەحمەد، لەدایکبوونی ساڵی 1982 ی گەڕەکی ئازادیی شاری کەرکوکە و خوێندنی سەرەتایی و ناوەندی و ئامادەیی هەر لەو شارە تەواوکردووە.
رێبوار تەها، خاوەنی بڕوانامەیەکی بەکالۆریۆسە لە کۆلێژی پەروەردە بەشی زمانی ئینگلیزی و بڕوانامەیەکی بەکالۆریۆس لە یاسا و بڕوانامەی دیبلۆمی کارگێڕی و یاسایە.
لە ساڵی 2014 بووەتە ئەندام لە ئەنجومەنی نوێنەرانی عێراق و لە لیژنەی دەستپاکی کاریکردووە، لە ساڵی 2018 سەرۆکی لیستی (ی.ن.ک) بووە و بۆ جاری دووەم بووەوە بە ئەندامی ئەنجوومەنی نوێنەران و جێگری سەرۆکی لیژنەی نەوت و وزە بووە.
لە کۆنگرەکانى چوارەم و پێنجەم وەک ئەندامی ئەنجومەنى سەرکردایەتی یەکێتیی نیشتمانیی کوردستان هەڵبژێردراوە.
لە لێکەوتەکانی دوای ریفراندۆم و رووداوەکانی 16ی ئۆکتۆبەردا رۆڵێکی بەرچاوی بینی لە پاراستنی ماڵ و گیانی کوردانی کەرکوک و شارەکەی بەجێنەهێشت.
لە ساڵی 2023 وەک سەرۆکی هاوپەیمانی کەرکوک هێز و ئیرادەمانە، بەشداریی هەڵبژاردنی ئەنجومەنی پارێزگای کەرکوکی کرد و بوو بە ئەندامی ئەنجوومەنی پارێزگاکە.
