فەرەنسا داوا لە هاووڵاتییانی خۆی دەکات بەزووترین کات لوبنان بەجێبهێڵن بەهۆکاری مەترسییەکانی پەرەسەندنی ململانێ سەربازییەکان لە رۆژهەڵاتی ناوەڕاست.
لە بەیاننامەیەکدا وەزارەتی دەرەوەی فەرەنسا رایگەیاند، ”لە چوارچێوەی بارودۆخێکی ناجێگیری ئەمنیدا، جارێکی دیکە سەرنجی هاوڵاتییانی فەرەنسا، بەتایبەت ئەوانەی لە ترانزێتدان، بۆ ئەو راستییە رادەکێشین کە گەشتە بازرگانییە راستەوخۆکان بۆ فەرەنسا هێشتا بەردەستن و داوایان لێدەکەین لە ئێستاوە کاروبارەکانیان رێکبخەن بۆ ئەوەی بە زووترین کات لوبنان جێبهێڵن”.
جەختلەوەش دەکاتەوە، ”بەهۆکاری مەترسییەکانی پەرەسەندنی ململانێ سەربازییەکان لە رۆژهەڵاتی ناوەڕاست داوا لە هاوڵاتییانی فەرەنسا دەکەین گەشت بۆ لوبنان نەکەن، هاوکات داوا لە هاوڵاتییانی فەرەنسی لە لوبنان دەکەین کە زۆر ئاگاداری خۆیان بن و بەبەردەوامی چاودێری ماڵپەڕی کونسوڵخانەی گشتیی فەرەنسا لە بەیروت بکەن”.
پێشتریش چەند وڵاتێکی عەرەبی و رۆژئاوا هۆشدارییان دابوو بە هاوڵاتییانیان و داوایان لێکردن خاکی لوبنان جێبهێڵن، هاوکات ژمارەیەک هێڵی ئاسمانی نێودەوڵەتی گەشتەکانیان بۆ بەیروت و گەڕانەوەیان هەڵوەشاندەوە، ئەمەش لەکاتێکدا پێشبینی ئەگەری پەرەسەندنی ململانێ سەربازییەکان لە ناوچەکەدا دەکرێت.
