شێركۆ بێكەس كوڕی شاعیری ناوداری كورد فایەق بێكەس، لە 2ی ئایاری ساڵی 1940 لە شاری سلێمانی لەدایكبووە و لە 4ی ئابی 2013 لە ستۆكهۆڵمی پایتەخی سوید بەهۆی شێرپەنجەوە كۆچی دواییكرد. كلیك بكە و زیاتر لەسەری بخوێنەرەوە.
شێركۆ بێكەس یەكەمین شیعری خۆی لە تەمەنی 17 ساڵیدا بڵاوكردەوە. ساڵی 1968 یەكەمین پەرتوكی شیعری بە ناوی “تریفەی هەڵبەست” لە بەغداد لە چاپدا، لە ساڵی 1970 لەگەڵ كۆمەڵێك لە شاعیرانی بەناوبانگی ئەو سەردەمە بانگەوازێكیان بۆ گۆڕانكاری لە شیعری كوردی و بەتایبەت بە لای شیعری نوێی كوردییەوە بڵاوكردەوە.
بێكەس بە یەكێك لە شاعیرە نوێخوازەكانی هاوچەرخی كورد دادەنرێت و خاوەنی چەندین نامیلكە و دیوانی شیعرییە و زۆرێك لە شیعرەكانی بۆ چەندین زمانی زیندوی جیهانی وەرگێڕدراون، ساڵی 1987 لە سوید “خە‌ڵاتی تۆخۆڵسكی” وەرگرتووە. لە ساڵی 1992 بووەتە وەزیری رۆشنبیری لە یەكەم كابینەی حكومەتی هەرێمی كوردستان. لە ساڵی 1998 بە هاوكاری چەند هاوڕێیەكی “دەزگای چاپ و پەخشی سەردەم”ی دامەزراند، لەساڵی 2009 تەواوی بەرهەمەكانی لە هەشت هەزار پەڕە لە چاپ دا.
وەسێتنامەكەی
من نامەوێت لە هیچ كام لە گرد و گردۆڵەكەكاندا بنێژرێم كە دیارن و ناویان ئەبرێ، یەكەم لەبەرئەوەی پڕبوونەتەوە و دووەم لەبەرئەوەی من حەز بە قەرەباڵغی زۆر ناكەم، من ئەمەوێ ئەگەر سەرۆكی شارەوانی و ئەنجومەنی شارەوانیی شارەكەم رێگەم پێبدا و ئەوەم پێ رەوا ببینن كە لە پاركی ئازادیدا و بە تەنیشت مۆنۆمێنتەكەی شەهیدانی (1963)ی سلێمانیەوە بمنێژن، ئەوێ خۆشترە و تەنگەنەفەس نابم، من حەز ئەكەم بە مردووییش نزیكی ئەو خەڵكە و ژن و پیاو‌ی شارەكەم و دەنگی مۆسیقا و گۆرانی و هەڵپەڕكێ و یانە جوانەكانی ئەو پاركە بم. با كتێبخانەكەم و دیوانەكانم و وێنەكانم ببرێن بۆ شوێن مەزارەكەم، با كافتریایەك و باخچەیەكی بچكۆلانە لەو شوێنەدا هەبێت بۆ ئەوەی شاعیران و نو‌وسەران و كچ و كوڕی دڵدار ببنە میوانم، من ئەمەوێ لە ئێستاوە بەچاوی خەیاڵ تەماشای ئەو پاركە بكەم و دوای مردنی خۆم ببینم، ئەمەوێ بەدەم چریكەی دیلان و ئەڵڵا وەیسیەكەی مەردان و سروودی (خوایە وەتەن ئاواكەی)ـەوە ئاڵای كوردستانم تێوە پێچرابێ و بنێژرێم، من ئەمەوێ لە پرسەكەمدا مۆسیقا لێبدرێت، لەناو مەزارەكەمدا تابلۆی جوانی هونەرمەندانی شارەكەم هەڵبواسن، من ئەمەوێ دوای خۆم و بەناوی (بێكەس)ەوە خەڵاتێكی ساڵانە تەرخان بكرێ و بدرێت بە جوانترین دیوانە شیعری هەڵبژێردراوی ئەو ساڵە و خەرجی ئەم خەڵاتەیش لەو میراتە بدرێ كە جێیدەهێڵم.
نمونەی هەڵبەستێك:
چوار منداڵی..
تورک و فارس و
عەرەب و کورد
بە ھەر چواریان
وێنەی پیاوێکیان دروست کرد
یەکەم: سەری
دووهەم: دەستی
سێیەم: لەشی و قاچەکانی
چوارەم: چەکی کردە شانی!
