بەڕێوەبەری گشتیی کۆمپانیای دابەشکردنی بەرهەمە نەوتییەکانی عێراق رایگەیاند، فرۆشی ناوخۆیی لە رێگەی سیستمی پارەدانی ئەلیکترۆنییەوە لە ماوەی نیوەی یەکەمی ئەمساڵدا 2 ترلیۆن دیناری تێپەڕاند.
حسێن تالیب، بەڕێوەبەری گشتیی کۆمپانیای دابەشکردنی بەرهەمە نەوتییەکانی سەربە وەزارەتی نەوتی عێراق لە لێدوانێکیدا ئەوەی خستەڕوو، ”فرۆشی بەرهەمەکانمان لە رێگەی سیستمی پارەدانی ئەلیکترۆنییەوە لە ماوەی نیوەی یەکەمی ئەمساڵدا گەیشتە دوو ترلیۆن 110 ملیار و 901 ملیۆن 839 هەزار و 933 دینار و بەو پێیەش فرۆشمان لەو رێگەیەوە بە رێژەیەکی بەرچاو زیادیکردووە”.
دەشڵێت، ”کۆمپانیاکەمان لە 1ی نیسانی 2023ەوە دەستیکردووە بە کارکردن بە سیستمی پارەدانی ئەلیکترۆنی و ئێستا سەرجەم پارێزگاکان و ئەوانەی مامەڵەیان لەگەڵ کۆمپانیاکەماندا هەیە وەک بریکارەکانی غاز، نەوتی سپی، مۆلیدە و وێستگەکان کار بەو سیستمە دەکەن”.
