بڕیارە سبەینێ ئەنجومەنی پارێزگای كەركوك یەكەم كۆبوونەوەی خۆی بە سەرۆكایەتیی بەتەمەنترین ئەندامی هەڵبژێردراوی ئەنجومەنەكە ئەنجامبدات.
پەیامنێرمان لە شاری كەركوك پێیڕاگەیاندین، نیوەڕۆی ئەمڕۆ راكان جبوری، پارێزگاری بەوەكالەتی كەركوك گەیشتە دادگای شارەكە و وەك ئەندامی هەڵبژێردراوی ئەنجومەنی پارێزگای شارەكە سوێندی یاسایی خوارد.
ئەوەشی وت، “بەهۆی ئەوەی راكان جبوری، بەتەمەنترین ئەندامی هەڵبژێردراوە، سەرۆكایەتیی یەكەم كۆبوونەوەی ئەنجومەنی پارێزگا دەكات، كە بڕیارە سبەی بەڕێوەبچێت”.
دوێنێ محەمەد شیاع سودانی، سەرۆك وەزیرانی عێراق لە راگەیەندراوێكدا داوای لە ئەندامانی ئەنجومەنی پارێزگای كەركوك كرد رۆژی پێنجشەممە كۆبوونەوەیەك بە سەرۆكایەتیی بە تەمەنترین ئەندام ئەنجامبدەن.
ئاماژەی بەوەشدا، گفتوگۆ لە نێوان لایەنە براوەكانی كەركوك ئەنجامدراوە و، رێككەوتن كرا لەسەر پێكهێنانی هاوپەیمانیی بەڕێوەبردنی كەركوك كە سەرجەم هێزە براوەكان لەخۆدەگرێت.
