پۆلیسی سلێمانی رایدەگەیەنێت، دەست بەسەر بڕێک ماست و شیرەمەنیی خراپبوودا گیرا و تۆمەتبارێکیش دەستگیرکرا.
بەڕێوەبەرایەتیی پۆلیسی پارێزگای سلێمانی، لە راگەیەندراوێکدا بڵاویکردەوە، لەلایەن لیژنە هاوبەشەكانی قائیمقامیەتی قەزای سەیدسادق و بەهاوكاریی بنكەی پۆلیسی سەیدسادقی سەر بە بەشی پۆلیسی سەیدسادق تۆمەتبارێك دەستگیركراو دەست بەسەر بڕی زیاتر لە سێ هەزار و 500 سەتڵ ماست و سێ تۆن شیر و زیاتر لە 300 كیلۆگرام بەرهەمی شیرەمەنیی خراپبوودا گیرا لەناو كارگەیەکی دروستكردنی ماستدا لەگوندی كانی پانكە.
بەپێی راگەیەندراوەکە، تۆمەتبار ئەو ماست و شیرەمەنییە خراپبووانەی ئامادەكردبوو بەمەبەستی فرۆشتن و ساغكردنەوەی لەناو بازاڕەكاندا.
باس لەوەش دەکات، لەئێستادا تۆمەتبار بە بڕیاری دادوەر و بەپێی ماددەی 240 لەیاسای سزادانی عێراقی راگیراوە.
