لانی کەم 1000 حاجی لە کاتی بەجێگەیاندنی فەریزەی حەج ئەمساڵ لە مەککە گیانیان لەدەستداوە، ئەمەش بە هۆکاری پەیوەندیدار بە بەرزی پلەی گەرمی و فشاری گەرمییەوە روویداوە.
فشاری گەرمی دۆخێکە، جەستە ماندوودەبێت بەهۆی ئەوەی کەسەکە لە پلەی گەرمی بەرزدا بۆ ماوەیەکی زۆر دەمێنێتەوە و پلەی گەرمی جەستە بەشێوەیەکی بەرچاو بەرزدەبێتەوە، کەسەکە تووشی ماندووێتی و لاوازی دەکات.
بەگوێرەی وەزارەتی تەندروستیی سعودیە، نیشانەکانی سەرگێژخواردن، سەرئێشەی هەیە و لێدانی دڵ خێرا دەبێت و جەستەی بەرەو وشکبوونەوە دەچێت.
فشاری گەرمی، بەهۆی لەدەستدانی بڕێکی زۆر لە ئاو و خوێی جەستە روودەدات ئەوەش بەگوێرەی ئامارەکانی سەنتەری کۆنترڵکردن و خۆپاراستن لە نەخۆشییەکان.
فشاری گەرمی کاتێک روودەدات کە جەستە نەتوانێت خۆی لەگەڵ گەرمی ژینگەی دەرەوە و بەرزبوونەوەی پلەی گەرمی ناوەکی بگونجێنێت.
بەپێی راپۆرتی رێکخراوی تەندروستیی جیهانی، فشاری گەرمی هۆکاری سەرەکی مردنە و بەهۆی کەشوهەواوە روودەدات و دەتوانێت کاریگەریی نەخۆشییەکانی کەسەکە توندتربکاتەوە لەوانە نەخۆشییەکانی دڵ و خوێنبەرەکان، شەکرە، تەندروستی دەروونی و تەنگەنەفەسی.
هاوکات، بە گوێرەی قسەی پسپۆڕانی تەندروستی، کەمی چالاکی و ئەنجامنەدانی وەرزش لەماوەی ئاساییدا لە ژیانی کەسەکاندا، هۆکارێکی دیکەیە بۆ ماندووبوونی لە رادەبەدەر و کاتێک کەسێک کە هیچ جوڵەیەکی نییە دەچێتە حەج و بەشێوەیەکی لەپڕ توشی ماندووبوونی زۆر دەبێت لەو کەشە گەرمەدا دەبێتە هۆی زیادبوونی کێشە تەندروستییەکانی.
