بافڵ جەلال تاڵەبانی رایگەیاند، یەكێتی پشتبەستوو بە خەڵكە دڵسۆزەكەی و پابەند بە بەرژەوەندییە نەتەوەیی و نیشتمانییەكان، دەچێتە هەڵبژاردنەوە و بەهیواوە بەرەو گۆڕانكاری لە حوكمڕانی و گەیشتن بە داهاتوویەكی گەشتر و دادپەروەرانەتر هەنگاو دەنێت.
ئەمڕۆ شەممە بافڵ جەلال تاڵەبانی سەرۆکی یەکێتیی نیشتمانیی کوردستان لە دەباشان پێشوازی لە هەڤاڵ د. میران محەمەد، ئەندامی سەرکردایەتی كرد و باسی ئامادەكارییەكانی یەكێتی بۆ هەڵبژاردن و ئەركە حزبی و رێكخراوەییەكانیان كرد.
لە دیدارەکەدا بافڵ جەلال تاڵەبانی جەختی لە بەدەمەوەچوونی داواكارییەكانی خەڵك كردەوە و رایگەیاند، یەكێتی پشتبەستوو بە خەڵكە دڵسۆزەكەی و پابەند بە بەرژەوەندییە نەتەوەیی و نیشتمانییەكان، دەچێتە هەڵبژاردنەوە و بەهیواوە بەرەو گۆڕانكاری لە حوكمڕانی و گەیشتن بە داهاتوویەكی گەشتر و دادپەروەرانەتر هەنگاو دەنێت، بۆ ئەمەش پێویستە سەرجەم ناوەند و ئۆرگانەكان لەو چوارچێوەیەدا هەوڵەكانیان چڕتر بكەنەوە.
هاوکات ستایشی رۆڵ و ماندووبوونی د. میران محەمەدی كرد لە ئەرك و بەرپرسیارێتییەكانی رابردووی و داوایكرد، لەداهاتووشدا بە هەمان رۆحییەت و دڵسۆزییەوە درێژە بە كار و خزمەتەكانی بدات و ئاماژەی بەوەکرد، دڵنیاین هەروا دەبێت و هەنگاوەكانی لەخزمەت ژیانی خەڵكە خۆشەویستەكەمان و كوردستانی ئازیزمان دەبێت.
