دوانیوەڕۆی دوێنێ یەکشەممە، هەواڵی دیارنەمانی هێلیکۆپەتەرێک لە ئێران بڵاوکرایەوە و دواتر باس لەوەکرا، ئەو هێلیکۆپتەرە سەرۆک کۆماری ئێران و وەفدەی یاوەری تێدایە و ئاماژە بەوەکرا، دەکرێت تێکشکابێت، بەڵام چارەنووسی هێلیکۆپتەرەکە نادیار مایەوە و بە دەیان تیم لە گەڕاندا بوون، ئێران لە دۆخێکی تەواو نەخوازراودا مایەوە، تا لە ئەمڕۆدا راگەیەندرا کە تێکشکاوە و پاشماوەکەی دۆزرایەوە و دەرکەوت ئەوانەی تێیدا بوون هەموویان گیانیان لەدەستداوە.
لەناو فڕۆکەکە چەند کەسێکی گرنگی ئێران هەبوون، لە هەموویان گرنگتر سەرۆک کۆماری وڵاتەکە بوو، ئیبراهیم رەئیسی، دواتریش حسێن ئەمیر عەبدولەهیان، وەزیری دەرەوەی وڵاتەکە و مالیک رەحمەتی، پارێزگاری تەورێز و ئایەتوڵا ئەلهاشم، ئیمام جومعەی تەورێز و سەرۆکی پاسەوانەکانی سەرۆک کۆمار و پاسەوانێکی تایبەتی هەبوون.
بەیانی ئەمڕۆ لە نزیک کاتژمێر 7:30 خولەک، ئاژانسی هەواڵی میهری ئێران بڵاویکردەوە، ئیبراهیم رەئیسی سەرۆک کۆماری ئێران و ئەو تیمەی لەگەڵی بوون گیانیان لەدەستداوە و دواتریش حکومەت بە فەرمی هەوڵەکەی پشتراستکردەوە.
باس لەوە دەکرێت، بە گوێرەی یاسا دەبێت دەسەڵاتەکانی سەرۆک کۆمار بدرێتە دەست جێگری یەکەمی و ئەویش لەگەڵ سەرۆکی پەرلەمان و سەرۆکی دەسەڵاتی دادوەری ئەنجومەنێک پێکدەهێنن و لە ماوەیەکی کورتدا دەبێت ئامادەکاری بۆ هەڵبژاردن بکرێت، هەموو ئەمانە لە ژێر سەرپەرشتی رێبەری باڵای شۆرشی ئیسلامی ئێران، دەکرێت.
حکومەتی ئێران کۆبوونەوەی بەپەلە ئەنجامدەدات لەدوای گیانلەدەستدانی سەرۆک کۆماری وڵات و ماتەمینی گشتیی لە وڵاتەکە راگەیەندرا، بەڵام جەختیکردەوە هیچ بۆشاییەک لە بەڕێوەبردنی وڵاتدا دروست نابێت.
تێکشکاندی هێلیکۆپتەری سەرۆک کۆماری ئێران لەکاتی گەڕانەوەیدا بوو لە مەڕاسیمی کردنەوەی بەنداوێک لەسەر رووباری ئاراس.
