ئەمڕۆ تاقیکردنەوەکانی کۆتایی ساڵ بۆ خوێندکارانی پۆلە ناکۆتاکان لە هەرێمی کوردستان دەستیپێکرد و خوێندکارانی پۆلی چوارەمی سەرەتایی تاوەکو پۆلی 11ی ئامادەیی جگە لە پۆلی نۆیەمی بنەڕەتی بەشداریی تاقیکردنەوەکانیان کرد.
دەستپێکردنی تاقیکردنەوەکان لە کاتێکدایە، خوێندکارانی باخچەکانی ساوایان و خوێندکارانی پۆلی یەک و دوو و سێی سەرەتایی تاقیکردنەوەیان نییە و ساڵی خوێندنی ئەمساڵیان تەواوکردووە.
دەستپێکی وەرزی خوێندنی ساڵی 2023- 2024 دواکەوتنی بەخۆیەوە بینی بەهۆی بایکۆت و دۆخی مووچەی فەرمانبەرانەوە، لە کاتێکدا دەبوایە لە 10ی مانگی 9ی 2023 دەستپێبکات، بەڵام لە دوای مانگی یەک و تێپەڕبوونی وەرزێک دەستیپێکرد.
دڵشاد عومەر، بەڕێوەبەری گشتیی پەروەردەی سلێمانی ئاماژەی بەوەکرد، ئەمساڵ بابەتەکان کورتکرانەوە لە پەروەردەکانی سلێمانی بە جۆرێک ئەو بابەتانەی گرنگی زۆریان هەبووە بۆ خوێندکار ئەوانە بخوێندرێن و تەواو بکرێن.
ئاشکراشیکرد، پلان هەیە بۆ کردنەوەی خولی هاوینە بۆ خوێندکاران لەناو خوێندگەکاندا.
