تیمێكی پێكهاتوو لە گروپە شاخەوانییەكانی كوردستان گەشتێكی زانستییان لەسەر بەفری چیای هەڵگورد ئەنجامدا.
گەشتەكە لەژێر ناوی “ھونەری رێبەرایەتیکردنی تیمی شاخەوانیی لەسەر بەفر” لە رۆژانی 9 و 10ی ئایار لەلایەن فیدراسیۆنی شاخەوانیی کوردستان بۆ 11 شاخەوان بەڕێوەچوو.
فیدراسیۆنەكە بڵاویكردەوە، لەو گەشتەدا کە وانەکان لەلایەن مامۆستای رێگەپێدراوی بەشی تەکنیک و فێرکاریی فیدراسیۆنەكەیانەوە وترانەوە، تیایدا بەشێوەیەکی تیۆری و پڕاکتیکی (ھونەری ڕێبەرایەتیکردنی تیمی شاخەوانیی لەسەر بەفر) بەشێوەیەکی زانستی بۆ بەشداربووان شیکرایەوە.
ئاماژەی بەوەشكرد، بەشداربووان پێشتریش بەشداریی زنجیرە خولەکانی پەیوەست بە “رێبەری کوێستان”یان کردووە.
بەشی تەکنیک و فێرکاریی فیدراسیۆنی شاخەوانیی کوردستان، لەڕێگای کردنەوەی خول، سیمینار و ۆرکشۆپ، ھەروەھا ئەنجامدانی گەشتی زانستيی شاخەوانییەوە، ھەوڵدەدات کەسانی شارەزا، پسپۆڕ، راھێنەری بە ئەزموون و لێھاتوو پەروەردە بکات کە بۆ داھاتووی وەرزشەکانی شاخ و شاخەوانیی لە کوردستاندا ببنە ھەوێن و بەردی بناغەی شاخەوانییەکی ستاندارد و پێشکەوتوو، وەك ئەوەی لە راگەیەندراوی فیدراسیۆنەكەدا هاتووە.
بڕیاریشە فیدراسیۆنەكە لە ماوەیەکی نزیکدا، چەند خولێکی شاخەوانیی تایبەت بە بەفر و سەھۆڵ ئەنجامبدات.
