پاراستنی ریخۆڵە بابەتێکی گرنگە بۆ مرۆڤ، بەهۆی هەستیاری ئەندامەکە و لەو نێوەندەشدا چەند خۆراکێک هەن کاریگەری باشیان دەبێت و چەند هەنگاوێکیش هەن کاریگەرییان دەبێت لەسەر باشترکردنی کاری ریخۆڵە.
بە گوێرەی پسپۆڕانی بواری خۆراک، چەند هەنگاوێک بگیرێنەبەر کارگەرییان لەسەر باشترکردنی کاری ریخۆڵەکان دەبێت و لە دیارترینیان ئەمانەن:
خواردنی سەوزە و میوەکان، بەهۆی دەوڵەمەندییان بە ریشاڵەکان و ماددە خۆراکییەکان کە کاریگەرییان دەبێت لەسەر زیادکردنی بەکتریا بەسوودەکان بۆ ریخۆڵەی مرۆڤ.
دوورکەوتنەوە لە خواردنە پرۆسێس کراوەکان، زۆرجار خۆراکە پرۆسێس کراوەکان (ئامادەکراوەکان) رێژەیەکی بەرزی شەکری زیادکراو و چەوری ناتەندروست و ماددە دەستکردەکانیان تێدایە و دەبنە هۆی تێکدانی هاوسەنگی بەکتریاکانی ناو ریخۆڵە.
خواردنەوەی بڕی پێویستی ئاو، خواردنەوەی ئاوی پێویست بۆ تەندروستی سیستمی هەرس گرنگە، پاڵپشتی گەشەی بەکتریا سودبەخشەکان دەکات لە ریخۆڵەدا و کاری ئەندامەکان ئاسانتر دەکات.
کەمکردنەوەی فشاری دەروونی، چونکە فشار دەتوانێت کاریگەری نەرێنی لەسەر تەندروستی ریخۆڵە هەبێت بە گۆڕینی هاوسەنگی بەکتریاکانی ریخۆڵە و زیادکردنی هەوکردن.
خراپی کوالیتی خەو یان کەم خەوی دەتوانێت بەکتریاکانی ریخۆڵە تێکبدات و بەشداربێت لە کێشەکانی هەرسکردن. پێویستە ئامانجت ئەوە بێت هەموو شەوێک حەوت بۆ نۆ کاتژمێر بخەویت.
