پزیشكێكی ڕوسی، نیشانە ئاڵۆز و ناڕوونەكانی ماندووبوونی مێشك دەخاتەڕوو و دەڵێت، “ئاگاداری چەند نیشانەیەك بن ئاماژەن بۆ ماندووبوونی مێشكتان”.
دكتۆر ئۆلگا گوفمان پزیشكی پسپۆڕی مێشك و دەمار، “نیشانەی تەمومژاوی”ی ماندووبوونی مێشك ئاشكرادەكات و جەختدەكاتەوە كە لاوازبوونی یادەوەری، لە نیشانە سەرەتاییەكانی ماندووبوونی مێشكی مرۆڤە.
بەپێی وتەی دكتۆر ئۆلگا كە قسەی بۆ ماڵپەڕی “Lenta.Ru” كردووە، لاوازبوونی یادەوەری، كەمبوونەوەی توانای سەرنجدان و شڵەژان، نیشانەی ماندووبوونی مێشكن و دەبێت فەرامۆشنەكرێن، بە تایبەت ئەگەر كەسەكە پێشتر دووچاری كۆرۆنا بووبێت.
لەبارەی هۆكارەكانەوە، پسپۆڕەكەی مێشك و دەمار زۆربەكارهێنانی ئامێرە ئەلیكترۆنییەكان و هۆگربوونی مرۆڤ بە سەیركردنی شاشەوە دەستنیشاندەكات و دەڵێت، ئەو ڕەفتارە سەرباری سەرهەڵدانی نیشانەكانی پێشتر، مرۆڤ تووشی سەرئێشە و سڕبوونی پەلەكان و پشتئێشە دەكات، چونكە زۆربەكارهێنانی ئامێری ئەلیكترۆنی كاردەكاتەسەر فرمانەكانی كۆئەندامی دەمار.
دكتۆر ئۆلگا لەگەڵ كەمكردنەوەی ئەو كاتانەی مرۆڤ لە سەیركردن و بەكارهێنانی ئامێرە ئەلیكترۆنییەكاندا بەسەریاندەبات، ئامۆژگاریی كەسی تووشبوو بە “ماندووبوونی مێشك” دەكات سەردانی پزیشكی پسپۆڕی بوارەكە بكات و پشكنین بۆ مێشكی ئەنجامبدات.
