ناتالیا تانانکینا پزیشکیێکی پسپۆڕی رووسییە، چەند جۆرێک خۆراکی دەستنیشان کردووە کە رۆڵیان هەیە لە باشترکردنی باری دەروونی و کارکردنی مێشک و کۆئەندامی دەمار و دەڵێت، “زۆر بەرهەمی خۆراکی هەن کە کاریگەری ئەرێنییان لەسەر باشترکردنی باری دەروونی مرۆڤ هەیە.”
پزیشکەکە ئاماژە بە ماست و بەرهەمە شیرەمەنییەکان کە ماددەی دەستکردیان تێدانییە، دەکات، لەگەڵ ترشیات، یارمەتی باشترکردنی کارکردنی ریخۆڵەکان دەدەن و باری دەروونیش باشتردەکەن، چونکە پرۆبایۆتیک لەخۆدەگرن کە بەرگری بەرزدەکەنەوە و کارکردنی مێشک باشتر دەکەن.
ئەو پزیشکە ئاماژەی بۆ ئەوەش کردووە خواردنی مۆزیش دەتوانێت یارمەتیدەر بێت بۆ باشترکردنی باری دەروونی، چونکە شەکر و ریشاڵ و ڤیتامین B6 لەخۆدەگرێت، کە هەموو ئەمانە پێویستن بۆ کۆئەندامی دەمار.
پسپۆڕەکە جەختی لە گرنگی ئەو خۆراکانەش کردووەتەوە کە دەوڵەمەندن بە ئۆمیگا 3 و فۆلیک ئەسید و بایۆفلاڤۆنۆید و یارمەتیدەرن بۆ باشترکردنی باری دەروونی و ئەو خۆراکانەش بریتین لە ماسی و سەوزەی گەڵادار و توو و هەندێک جۆری بەهارات.
ئامۆژگاری خواردنی گوێز و دانەوێڵەی تەواو و ماسی و خواردنە دەریاییەکان و سەوزە و میوە دەکات و ئاماژەی بەوەداوە کە ئەو خۆراکانە ترشی ئەمینی تریپتۆفانیان تێدایە و کاریگەری لەسەر کارکردنی سیرۆتۆنین هەیە کە بەشدارە لە باشترکردنی باری دەروونی.
