حكومەتی هەرێم ڕاگرتنی دەوامی قۆناغەكانی 1 و 2ی بنەڕەتی و 12ی ئامادەیی تا 16ی ئەم مانگە درێژكردەوە.
جوتیار عادل، وتەبێژی حكومەتی هەرێمی كوردستان ئەمڕۆ پێنجشەممە 7ی كانونی دووەم ڕونكردنەوەیەكی بڵاوكردەوە و تیایدا دەڵێت، دوای ڕاوێژکردن لەگەڵ وەزارەتی تەندروستی حکومەتی هەرێمی کوردستان سەبارەت بە دۆخی ڤایرۆسی کۆرۆنا و سەرهەڵدانی نەوەی نوێی ئەو ڤایرۆسە لە هەندێک وڵات و دوای هەڵسەنگاندنی دۆخەکە بەتایبەت بابەتی دەستپێکردنەوەی خوێندن لە گشت خوێندنگە و زانکۆ و پەیمانگەکانی هەرێمی کوردستان، بڕیاردرا هەمان ئەو بڕیارانەی پێشوو کە لەم بارەیەوە دەرکراون، پەیڕەو بکرێن:
1. دەوامی قۆناغەکانی 1 و 2 بنەڕەتی و 12 ئامادەیی (حکومی ـ ناحکومی)، تا رۆژی (2021/1/16) ڕادەگیرێت و سەر لە نوێ هەڵسەنگاندن بۆ ڕەوشی تەندروستی دەكرێت.
2. قۆناغی 1 و 2 بنەڕەتی و 12 ئامادەیی دەتوانن تا کاتی کردنەوەی قوتابخانەکان، بەشێوەی “نائیلزامی” سوود لە وانەکانی قوتابخانەی ئەلیکترۆنی و ئۆنلاین وەربگرن.
3. قۆناغی 3 بنەرەتی تا 11 ئامادەیی (حکومی – ناحکومی) بەشێوازی ئەلیکترۆنی لە خوێندن بەردەوام دەبن. هەروەها تا ڕۆژی (2021/1/16) و سەر لە نوێ هەڵسەنگاندنی بۆ رەوشی تەندروستیی، سەردانکردنی بە گروپ و ئامادەبوون لە قوتابخانەکان ڕادەگیرێت.
4. ئەو قوتابخانانەی کە لە گوندەکان و ئەو ناوچانەی كە هێڵی ئینتەرنێتیان وەک پێویست نییە و ژمارەی قوتابیانیان سنووردارە، دەوامیان بۆ گشت قۆناغەکان ڕادەگیرێت.
5. دەوامی باخچەی منداڵانی ناحکومی، تا ڕۆژی (2021/1/16) ڕادەگیرێت و سەر لە نوێ هەڵسەنگاندن بۆ ڕەوشی تەندروستی دەكرێت.
6. دەوامی پەیمانگاکانی حکومی و ناحکومیی وەزارەتی پەروەردە، تا ڕۆژی (2021/1/16) ڕادەگیرێت و سەر لە نوێ هەڵسەنگاندن بۆ ڕەوشی تەندروستی دەکرێت.
7. بەمەبەستی ڕێکخستنەوەی ساڵنامەی خوێندن و تاقیکردنەوەکان، وەزارەتی پەروەردە بۆ دەستپێکردنەوەی دەوام سوود لەو پشووە فەرمییانە وەردەگرێت کە بە پێویستی بزانێت.
8. لە زانكۆ و پەیمانگاکان بۆ بەشە زانستییەکان، سیستەمی خوێندنی نێو كامپەس و خوێندنی ئەلیكترۆنی (خوێندنی ئاوێتە)، بەپێی ھەمان پلانی پێشوو ھەروەھا بە ڕەچاوکردنی ڕێنماییە تەندروستییەکان، تا ڕۆژی (2021/1/16) وەك خۆی بەردەوام دەبێت.
9. بەشە مرۆییەکانیش لە زانکۆ و پەیمانگەکاندا بە ڕەچاوکردنی ڕێنمایی تەندروستیی زیاترەوە، تا (2021/1/16) بەھەمان شێوەی پێشوو وەک خۆی بەردەوام دەبێت.
وتەبێژی حكومەت ڕاشیگەیاندووە، ئەم بڕیارانە لە ڕۆژی (2021/1/7) کاری پێدەکرێت، دوای ئەم ڕێککەوتەش لیژنە کۆدەبێتەوە بۆ سەر لە نوێ تاوتوێکردنی ڕەوشی تەندروستیی هەرێمی کوردستان.
