هەرێم چ کۆدێکی هێزە ئەمنییەکانی داوەتە عێراق؟

ئەمینداری پێشووی وەزارەتی پێشمەرگە رایگەیاند، هەرێم هەفتەی رابردوو کۆدی دامودەزگا ئەمنییەکانی بۆ بەغداد ناردووە و لە ئێستادا وردبینی لەو کۆدانەدا دەکرێت، چونکە گومان بۆ عێراق دروستبووە، خەڵکی سوری و تورکی لەناو لیستی مووچەدا هەبێت.

جەبار یاوەر، ئەمینداری گشتیی پێشووی وەزارەتی پێشمەرگە لە لێدوانێکدا رایگەیاند، عێراق دەیەوێت لە رێگەی پەنجەمۆرەوە ژمارە و ناسنامەی کارمەندانی هێزە ئەمنییەکانی حکومەتی هەرێم بزانێت.

سەبارەت بەوەی تا چەند عێراق دەتوانێت لە ڕێگەی کۆدەوە ناسنامەی کارمەندانی دەزگا ئەمنییەکانی هەرێم ئاشکرابکات، دەنگی ئەمریكا لە زاری جەبار یاوەر نمونەی هێنایەوە و وتی، “من جەبار یاوەرم و پلەکەم فەریقە لە وەزارەتی پێشمەرگە، لە بری ناوەکەم لە کۆد نەمبەردا ژمارە 4891 دەڕوات بۆ وەزارەتی دارایی عێراق، بەڵام زانیاری لەبارەی پلە و بڕی مووچە و هەموو ئەوانە لەگەڵ کۆد نەمبەرەکەدا دەنێردرێت”.

بە گوێرەی زانیارییەکان کە لە سەرچاوەیەکی وەزارەتی داراییەوە دەستکەوتووە، ئەو کۆدەی رەوانەی بەغداد کراوە، پلە و مووچە و بڕوانامە و زانیارییەکانی دیکەی تێدایە جگە لە ناو و، ئەوەش وەک چارەسەرێکی ناوەندی لە نێوان هەرێم و عێراق کراوە.