لوقمان حەوێز، گەردونناس و ئەندامی کۆمەڵەی گەردونناسی تەکساس دەڵێت، “بە گوێرەی لێکدانەوەکان و پێشهاتەکان بەپێی ئەو داتایانەی دەستم کەوتوون، لە دوای نیوەڕۆی ئەمڕۆ تاوەکو درەنگانی ئەمشەو بارانی بەهێز دەبارێت و ئەگەری دروستبوونی لافاو دەبێت لەناوچە جیاوازەکانی هەرێم.”
لوقمان حەوێز ئاماژەی بەوەکردووە، پلەکانی گەرما لە ناوەڕاست و رۆژئاوای عێراق ئێستا لەبەرزبونەوەیە، ئەمەش ناسەقامگیرییەکی زۆر دروست دەکات دوای چەند کاتژمێرێکی کەمی تر لە کەشی ناوەڕاست و رۆژئاوای عێراق بە گشتی و دواتر ناوچەکانی باشوور و رۆژهەڵاتی کوردستانیش.
باسی لەوەشکردووە، ناسەقامگیرییەکە بەهۆی مانەوەی سەنتەری نزمە پاڵەپەستۆکە لە ئێستادا لەو شوێنە و بەهۆی هاتنی بڕێکی زۆر لە شێی دەریای سور و بەرکەوتنی بە هەوای سارد کە لە دەریای سپی ناوەڕاست و لە باکوورەوە دێت و لەسەر ناوەڕاستی عێراق و ناوچەکانی باشووری کوردستان هەردوو تۆپەڵە هەوا بەیەکتری دەگەن.
ئەوەشی روونکردووەتەوە، ئەو ناسەقامگیرییە دەبێتە هۆی دروستبوونی دابارینی مامناوەندی لە زۆربەی شوێنەکان و دابارینی و بەخوڕ و بەلێزمەش لە هەندێک ناوچە بەتایبەتی لە دوای نیوەڕۆ تاوەکو درەنگانی ئەمشەو لە ناوچە جیاوازەکانی باشووری کوردستان سەرەتا لە هەولێر و کەرکوک و دهۆک و زاخۆ دواتر دەگاتە ناوچەکانی گەرمیان و هەڵەبجە و سلێمانی و لەوێ و لە ناوچە سنووریەکانیش و بەرەو رۆژهەڵاتی کوردستان دابارینەکان بەهێزتر دەبن.
گەردونناسە کوردەکە ئەوەشی روونکردووەتەوە، لە هەندێک شوێن لەوانەیە دابارینەکان تەرزە و بروسکە و هەورە تریشقەی زۆریشی لەگەڵدا بێت و ئەگەری دروستبوونی هەوری سوپەر سێڵیش لەئارادایە و لەو شوێنانەی دروست دەبن دابارین بەهێزتردەبێت، ئەگەری دروستبوونی لافاو لە چەمەکان و نزیک رووبارەکان و شوێنە نزمەکان ئەگەرێکی بەهێزە بەتایبەتی لە دوای نیوەڕۆوە تا بەرەبەیانی سبەی چوارشەممە.
