سەرۆک وەزیرانی عێراق بڕی 50 ملیار دیناری بۆ سندووقی ئاوەدانکردنەوەی قەزای شەنگال تەرخانکرد.
نووسینگەی سەرۆک وەزیرانی عێراق، لە راگەیەندراوێکدا بڵاویکردەوە، “محەمەد شیاع سودانی، سەرۆک وەزیرانی عێراق سەرپەرشتیی کۆبوونەوەی ئەنجوومەنی پارێزگای نەینەوای کرد، کە لە قەزای شەنگال لە رۆژئاوای پارێزگاکە بەڕێوەچوو”.
بەپێی راگەیەندراوی نوسینگەی سەرۆک وەزیرانی عێراق، “حکومەتی فیدراڵی پابەندە بە پاڵپشتیکردنی حکومەتە خۆجێیەکان لە خزمەتگوزارییەکان و دابینکردنی هەلی کار و چارەسەرکردنی هەژاری و چاکسازیی ئابووری”.
سەرۆک وەزیرانی عێراق رایگەیاند، “بەڕێوەچوونی ئەم کۆبوونەوەیە لە قەزای شەنگال پەیامێکە بۆ خەڵکی قەزاکە سەبارەت بە ئامادەیی حکومەت بۆ دەستپێکردنی هەڵمەتێکی فراوانیی ئاوەدانکردنەوە، لەلایەن حکومەتەوە بڕی 50 ملیار دینار بۆ سندووقی ئاوەدانکردنەوەی دەشتی شەنگال و نەینەوا لە بودجەی فیدراڵی تەرخاندەکرێت”.
