فەرماندەی هێزەكانی پشتیوانیی دوو رایدەگەیەنێت، هیچ بڕیارێك نەدراوە بۆ ساڵی داهاتوو ئەمریكا هاوكارییەكانی بۆ هێزەكانی پێشمەرگە رابگرێت و جەختیشدەكاتەوە، “بڕیارە لە ساڵی داهاتووەوە هێزەكانی پشتیوانی یەك و دووش كە دەچنە سەر لیوا هاوبەشەكان مووچەیان لەلایەن ئەمریكا و هاوپەیمانانەوە بۆ خەرجبكرێت”.
لیوا مەریوان محەمەد ئەمین فەرماندەی هێزەكانی پشتیوانیی دوو لە لێدوانێكدا بە تۆڕی میدیایی ئێستای راگەیاند، “ئەوەی باسدەكرێت گوایە ئەمریكا و هاوپەیمانان هاوكاری و مووچەی لیوا هاوبەشەكان كە دابیندەكەن دەبڕدرێت هیچ بنەمایەكی نییە و دوورە لە راستییەوە و پەیوەندییم لەگەڵ هاوپەیمانان زۆرباشە و بە هیچ شێوەیەك لە كۆبوونەوەكاندا باسیان لەوە نەكردووە هاوكارییەكانی پێشمەرگە رادەگرن”.
ئاماژەی بۆ ئەوەش كرد، هێزەكانی پشتیوانیی یەك و دوو و چەند لیوایەكی دیكەیە كە دەخرێنە سەر لیوا هاوبەشەكان بڕیارە لە سەرەتای ساڵی نوێیەوە لەلایەن ئەمریكا و هاوپەیمانانەوە مووچە و هاوكارییان بۆ دابینبكرێت و ئەمریكا ئەگەر بڕیاری راگرتنی مووچە و هاوكارییەكانی بۆ هێزەكانی پێشمەرگە بدات شەرم ناكەن و راستەوخۆ باسیدەكەن و هەنگاوی بۆ دەنێن، بەڵام تا ئێستا بە هیچ شێوەیەك باسیان لە راگرتنی ئەو هاوكارییانە بۆ لیوا هاوبەشەكان نەكردووە.
