بەڕێوەبەری گشتیی گەشتوگوزاری سلێمانی رایگەیاند، “هەنگاوی یەکەمی پڕۆژەکانی نۆژەنکردنەوەی سەرچنار بە فراوانکردنی شەقامەکە دەستپێدەکات و بەنداوێکی نوێش دروستدەکرێت”.
شاناز عامر بەدران، بەڕێوەبەری گشتیی گەشتوگوزاری سلێمانی بە تۆڕی میدیایی ئێستای راگەیاند،”بۆ گلدانەوەی ئاوی سەرچنار پلانێکمان داناوە بەنداوێکی نوێ دروستبکەین کە دواتر هاوڵاتییان سوودی لێ وەربگرن”.
سەبارەت بە پڕۆژەکانی دیکەی سنووری سەرچنار ئەوەی خستووەتەڕوو، “پلانمان هەیە کۆمەڵێک پڕۆژەی زۆر گرنگ لە سەرچنار جێبەجێ بکەین و لە ئێستادا تەنها چەند رێکارێکی یاسایی و هونەری ماوە و لە ماوەیەکی نزیکدا دەست بە کارەکان دەکرێت”.
دەشڵێت، “ئێستا کار لەسەر دیزان و فراوانکردنی شەقامی سەرەکی سەرچناردا دەکرێت وەک هەنگاوی یەکەم و سەرچنار دەگەڕێنینەوە بۆ سەرچناری جاران”.
