وەزارەتی گواستنەوەی عێراق رایدەگەیەنێت، بەم نزیکانە پڕۆژەیەک بۆ پەرەپێدانی فڕۆکەخانەی نێودەوڵەتیی بەغداد جێبەجێ دەکرێت.
رەزاق موحەیباس سەعداوی، وەزیری گواستنەوەی عێراق لە لێدوانێکیدا ئاماژەی بەوە کردووە، “لە چەند رۆژی داهاتوودا رێککەوتنێک لەگەڵ کۆمپانیای دارایی نێودەوڵەتی (IFC) سەبارەت بە نۆژەنکردنەوە و پەرەپێدانی فڕۆکەخانەی نێودەوڵەتیی بەغداد واژۆدەکەین”.
جەختیلەوە کردەوە، “دەمانەوێت کۆمپانیای دارایی نێودەوڵەتی بەشداربێت لە ستراتیژیی ئامادەکردنی فڕۆکەخانەی نێودەوڵەتیی بەغداد بەشێوەیەک کە لەگەڵ پێداویستییە جیهانییەکاندا بگونجێت”.
دەشڵێت، “ئامانجی ئەم رێککەوتنە بەرزکردنەوەی ئاستی کارایی فڕۆکەخانەکە و هۆکارەکانی سەلامەتییە، هەروەها هەوڵێك هەیە بۆ پەرەپێدانی سەرجەم فڕۆکەخانەکان و باشترکردنی خزمەتگوزارییەکانیان لە وڵاتدا”.
