مایکرۆسۆفت رایگەیاند، تا ساڵی 2025 بە بڕی 3.4 ملیار دۆلار لە ئەڵمانیا وەبەرهێنان دەکات بەتایبەتی لە فراوانکردنی هەوڵەکانی کۆمپانیاکە لە بواری زیرەکی دەستکرد.
براد سمیس، جێگری سەرۆکی ئەنجومەنی کارگێڕیی کۆمپانیای مایکرۆسۆفت لە لێدوانێکیدا ئاماژەی بەوە کرد، “وەبەرهێنانەکە بە ئاڕاستەی دوو هێندەکردنی توانای ژێرخانی زیرەکی دەستکرد و ناوەندی داتای مایکرۆسۆفت ئەنجامدەدرێت”.
قازانجی مایکرۆسۆفت لە ئەمساڵدا تا ئێستا بە رێژەی 33٪ بەرزبووەتەوە و گەیشتووەتە 22 ملیار دۆلار، پێشتریش داهاتی کۆمپانیاکە لە چارەکی کۆتاییدا لە 31ی کانوونی یەکەمی 2023 زیاتر لە 17٪ لە چاو ساڵی رابردوودا بەرزبووبووەوە و گەیشتبووە 62 ملیار دۆلار.
کۆمپانیای مایکرۆسۆفت لە مانگی تشرینی یەکەمی ساڵی رابردوودا وەبەرهێنانی بە بڕی 3.2 ملیار دۆلار لە ئوستڕاڵیا راگەیاند، کە گرنگی بە زیرەکی دەستکرد دەدات و جەختیلەوە کردبووەوە کە ئەوە دەبێتە هۆی بەهێزبوونی ئابووری وڵات و بەرگری ئەلیکترۆنی، هاوکات ئەوە گەورەترین وەبەرهێنانی ئەو کۆمپانیایەیە لەو وڵاتە لە ماوەی 40 ساڵی رابردوودا.
