لە رۆژی جیهانی خۆشەویستیدا دەزگای MQ ی تایبەتمەند بە توێژینەوە لەبواری تەندروستیی دەروونی لەبەریتانیا کۆمەڵێک هەنگاوی بۆ ئەو کەسانە خستووتە روو کە لە پەیوەندی خۆشەویستیدا نین.
دەزگاکە بڵاویکردووەتەوە، لە رۆژی خۆشەویستی و هەر رۆژێکی دیکەدا باشترین پەیوەندی پەیوەندی مرۆڤە بە خودی خۆیەوە، بەو مانایەی کە خۆت خۆشبوێت و پارێزگاری لە خۆت بکەیت و گرنگی بە خۆت بدەیت و خۆت قبووڵ بکەیت باشترین کارێکیش لە رۆژی خۆشەویستیدا بۆ ئەم مەبەستە بیکەیت بریتییە لە:
– کارکردن لەسەر خۆشەویستنی خود، کە ئەمە خۆی لە خۆیدا گەشتێکی دووروودرێژە، بەڵام دەکرێت لە رێگەی ئەنجامدانی ئەو چالاکییانەی دەروونت داوایان دەکات و پێویستی پێیەتی و خۆدوورخستنەوەیە لەو کێشانەی کە دەروون هیلاک دەکەن بەرەوپێشی ببەیت.
-ئەنجامدانی چالاکی داهێنەرانە، کە ئەمە خۆی لە هەر چالاکییەکدا دەبینێتەوە کە دەروون ئارام دەکاتەوە خەمۆکی و دڵەڕاوکێ کەمبکاتەوە.
-خواردنی ژەمێکی خۆش و بەسوود
-ئاشنابوون بە چیرۆکێکی نوێ ئەویش لە رێگەی سەیرکردنی شانۆیەک، یان فیلمێک، یان خوێندنەوەی کتێبێکی نوێ.
-بەسەربردنی کات لەگەڵ هاوڕێیانت.
-نواندنی هاوسۆزی لەگەڵ کەسانی دیکە
-بەسەربردنی کات لە سرووشتدا.
