سەرۆكی یەكێتی رایدەگەیەنێت، بۆ ئێمە پاراستنی ژیانی خەڵك و ئارامیی كوردستان لەهەموو شتێك پیرۆزترە و دووپاتیشیدەكاتەوە، دەستدرێژیكردنە سەر خەڵك و مافەكانیان هێڵی سوورە.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان لەگەڵ لێپرسراوی مەڵبەندەکانی حزبەكەی کۆبووەوە و، ستایشی رێكخستنەكانی یەكێتی كرد بۆ بەجێگەیاندنی ئەركە حزبییەكان و وتی، “بەرپرسیارێتیی هەموو یەكێتییەكانە لەهەر پلە و پایەیەكدا بن كار بۆ خزمەتی كوردستان و بەدیهێنانی ئامانجە باڵاكان بكەن”.
بافڵ جەلال تاڵەبانی ئەوەشی وت، یەكێتی بەرپرسیارە لە ژیان و گوزەرانی خەڵكی كوردستان، بۆیە دەبێت سەرجەم ئۆرگانەكان لە خزمەت خەڵك و گەیاندنی داواكارییەكانیاندا بن.
وتیشی، “بۆ ئێمە پاراستنی ژیانی خەڵك و ئارامیی كوردستان لەهەموو شتێك پیرۆزترە، بۆیە جارێكیتر دووپاتیدەكەینەوە هەر لێپرسراوێک لەهەر بەرپرسیارێتییەكی حزبی، حكومی و ئەمنیدا بێت و ناونیشانەكەی بۆ بەرژەوەندیی تایبەت بەكاربهێنێت، لێپێچینەوەی توندی لەگەڵ دەكەین و رادەستی یاسای دەكەین”.
سەرۆكی یەكێتی روونیشیكردەوە، دەستدرێژیكردنە سەر خەڵك و مافەكانیان هێڵی سوورە و یاساشكێنی قبووڵكراو نییە، بۆیە ئەركی هەموو یەكێتییەكە پارێزەری ژیان و گوزەرانی خەڵك بێت و هەموو هەوڵێكیان لەپێناو چاكەی گشتیدا بێت.
لە کۆبوونەوەکەدا كە رەفعەت عەبدوڵا و دەرباز کۆسرەت رەسوڵ، ئەندامانی مەکتەبی سیاسی ئامادەبوون، سەرکەوت زەکی، لێپرسراوی مەکتەبی رێکخستن راپۆرتێكی لەبارەی راسپاردە و پێشنیارەكانی دووەمین كۆنفرانسی مەكتەبی رێكخستن خستەڕوو و شێوازی رێكخستنەوەی ئۆرگانەكانی روونكردەوە.
