زانایانی زانکۆی براون بۆیان دەرکەوتووە کە زیادبوونی بەرکەوتن بە گازی رادۆنی تیشکدەر لەوانەیە مەترسیی تووشبوون بە جەڵتەی مێشک لە خانماندا زیاد بکات.
گۆڤاری Neurology توێژینەوەیەکی لەسەر 158 هەزار و 910 هەزار ژن ئەنجامداوە کە تێکڕای تەمەنیان 63 ساڵانە، توێژەران زانیارییان لەسەر دۆخی تەندروستیی سەرجەم بەشداربووان کۆکردەوە و داوایان لێکردن ناونیشانی نیشتەجێبوونیان بنووسن، بۆ ئەوەی ئەو ناوچانە دەستنیشان بکەن کە چڕیی گازی رادۆن لە خاک و ئاوەکەیاندا زۆرە.
گازی رادۆن گازێکی سروشتییە کە بێ رەنگ و بێ بۆن و بێ تامە و لە ئەنجامی دابەشبوونی سروشتی یۆرانیۆم دروست دەبێت، ئەو گازە دەتوانێت لە خاک و بەرد و ئاو و کەرەستەی بیناسازییەوە دەربچێت.
لە ماوەی توێژینەوەکەدا کە 13 ساڵی خایاند، شەش هەزار و 979حاڵەتی جەڵتەی مێشک تۆمارکراون، توێژەران بۆیان دەرکەوتووە کە ژیان لە ناوچەیەکدا کە چڕیی رادۆنی تێدا زیاترە، مەترسیی جەڵتەی مێشک بە رێژەی %14 زیاد دەکات.
زیادبوونی چڕیی ئەم گازە لە خاک و ئاو و هەوادا بۆ 2-4 pCi/L دەبێتە هۆی زیادبوونی مەترسیی جەڵتەی مێشک بە رێژەی لەسەدا 6.
توێژەران ئاماژە بەوە دەکەن کە پێویستە ئەم ئەنجامانە بە وریاییەوە لێکبدرێنەوە، چونکە توێژینەوەکە داتای تایبەت بە ژنانی تەمەن ناوەڕاست و بەتەمەنی لەخۆگرتووە، جەخت لەسەر پێویستی ئەنجامدانی توێژینەوەی زیاتر لەم بوارەدا دەکەنەوە.
