دەزگای ئاسایشی هەرێم تۆڕێكی بازرگانی ماددەی هۆشبەر هەڵدەوەشێنێتەوە و دواین تۆمەتباریان بە برینداری لەلایەن بەڕێوەبەرایەتیی نەهێشتنی ماددە هۆشبەرەكان و بە هەماهەنگی بەڕێوەبەرایەتیی ئاسایشی رۆژئاوا دەستگیركرا.
بەپێی راگەیەندراوێكی دەزگای ئاسایشی هەرێم، 8ی ئەم مانگە لە ناحیەی تەكیە بە فەرمانی دادوەری لێكۆڵینەوە هێزەكانی ئاسایش هەوڵی دەستگیركردنی بازرگانێكی ماددەی هۆشبەریاندا، لەئەنجامدا تۆمەتبار بە چەك رووبەڕوی هێزەكانمان بووەوە، سەرئەنجام توانرا بە برینداری دەستگیربكرێت و بڕی دوو كیلۆگرام ماددەی كریستاڵیش دەستی بەسەردا گیرا.
هەر لە راگەیەندراوەكەدا هاتووە، ئۆپەراسیۆنەكە لە چوارچێوەی دەستگیركردنی سەرجەم ئەندامانی ئەو باندە بازرگانەبوون، كە دوێنی دواین تۆمەتباریان بە برینداری لەلایەن بەڕێوەبەرایەتیی نەهێشتنی ماددە هۆشبەرەكان و بەهەماهەنگی بەڕێوەبەرایەتیی ئاسایشی رۆژئاوا دەستگیركرا.
