ئەندامێکی ئەنجومەنی نوێنەرانی عیراق رایگەیاند، “پرسی مووچەی فەرمانبەرانی هەرێم مەترسی لەسەر نییە و لەلایەن دادگای فیدراڵییەوە زامن کراوە”.
سۆران عومەر، ئەندامی ئەنجومەنی نوێنەرانی عێراق لە لێدوانێکیدا بۆ تۆڕی میدیایی ئێستا رایگەیاند، هەرچەندە لە کۆتاییەکانی مانگی نیسان نزیک دەبینەوە، بەڵام تاوەکو ئیستا حکومەتی هەرێمی کوردستان تەنها داهاتی ناوخۆی دوو مانگی ناردووە و ئەمەش ناڕەزایەتی عێراقی لێدەکەوێتەوە.
ئاماژەی بەوەشدا، مووچەی فەرمانبەرانی هەرێمی کوردستان، لەلایەن دادگای فیدراڵییەوە زامن کراوە و هیچ مەترسییەکی لەسەر نییە، هەربۆیە گۆڕانکاری لە بودجەدا کاریگەریی لەسەر دابینکردنی مووچەی فەرمانبەرانی هەرێم دروستناکات.
ئەوەشی خستەڕوو، ئەو بڕە پارەیەی حکومەتی هەرێم رادەستی بەغدادی کردووە، بریتیبووە لە 51 ملیار و 48 ملیار دینار بۆ داهاتی دوو مانگ، هەرچەندە بڕەکە ناڕەزایەتی عێراقی لێدەکەوێتەوە بەڵام بەهۆی نزیکبوونەوەی هەڵبژاردنی ئەنجومەنی نوێنەرانەوە، ئەگەری هەیە چاوپۆشی لە هەندێک وردەکاری بکرێت.
