بە گوێرەی راگەیەندراوی کەشناسیی کشتوکاڵی سلێمانی، رێژەی باران بارینی ئەمساڵ لە شاری سلێمانی رێژەی بارانبارینی ساڵی رابردووی تێپەڕاندووە و تەنها لە 24 کاتژمێری رابردوودا، 40 ملیم باران باریوە.
ئەمڕۆ سێشەممە کەشناسیی کشتوکاڵی سلێمانی رێژەی بارانبارینی 24 کاتژمێری رابردووی سلێمانی و ناوچەکانی دەوروبەری بڵاوکردەوە، زۆرترین رێژەی باران لە پێنجوێن باریوە کە 69.5 ملیم بووە و کەمترینیش لە کفری بووە کە 1.2 ملیم بووە.
هەر بە گوێرەی راگەیەندراوەکە، کۆی گشتیی بارانبارینی ئەمساڵ لە سلێمانی 301.8 ملیم بووە و زۆرترە لە رێژەی بارانبارینی ساڵی رابردوو کە 301.7 ملیم بووە، زۆرترین رێژەی بارانبارین لەمساڵدا لە ناوچەی بەرزنجە بووە کە 720 ملیم باران باریووە و کەمترین رێژەش لە کفری بووە بە 107.5 ملیم.
