نوێنەرایەتی نەتەوە یەکگرتووەکان لە عێراق (یونامی) رایگەیاند، ئەمڕۆ کۆبوونەوەی ئەنجومەنی ئاسایشی نێودەوڵەتی سەبارەت بە دۆخی عێراق ئەنجام دەدات.
ئەمڕۆ سیشەممە، نوێنەرایەتی نەتەوە یەکگرتووەکان لە پێگەی X بڵاویکردەوە، ئەنجومەنی ئاسایشی نێودەوڵەتی سەر بە نەتەوەیەکگرتووەکان لە کاتژمێری 6:00ی ئێوارە بە کاتی بەغداد لەبارەی دۆخی عێراقەوە کۆدەبێتەوە.
عەباس کازم عەبید نوێنەری عێراق لە ئەنجومەنی ئاسایشی نێودەوڵەتی رایگەیاند، عێراق هۆشاداری لەبارەی فراوانبوونی ئاڵۆزییەکان لەناوچەکە داوە و عێراق هەر جۆرە ئاڵۆزی و هێرش و پەلامارێک لەناو خاکەکەی رەتدەکاتەوە و وتوشیەتی، “نامانەوێت عێراق بکرێتە شوێنی یەکلاکردنەوەی ململانێکان.”
ئەمەش لە کاتێکدایە نوێنەری چەندین وڵات لە ئەنجومەنەکە هێرشەکەی ئەم دواییە ئەمریکای بۆ سەر خاکی عێراق ئیدانە کردووە.
