میرکاتۆی زستانی 2021 بۆ یانەکانی ئەوروپا ئاگرین دەبێت، هەندێکیان بۆ ڕێکخستنەوەی پێکهاتەکانیان ئامادەییان نیشانداوە بۆندی هەژێنەر واژووبکەن، هەندێکی دیکەشیان سودمەند دەبن لە کەمبوونەوەی نرخەکان و ئەو یاریزانانەی بۆندەکانیان کۆتاییدێت.
ڕۆژنامەی زە سەنی بەریتانی پێشبینی کردووە، میرکاتۆی زستانی 2021 یەکێکبێت لە بەهێزترین وادەکانی گواستنەوەی یاریزانان لە مێژووی تۆپی پێ، هۆکارەکەشی بۆ ئەگەرەکانی واژووکردنی حەوت گرێبەستی گەورە گەڕاندووەتەوە، کە پێکهاتوون لە:
لیۆ مێسی: هاوینی 2021 بۆندەکەی کۆتاییدێت و یانەکانی مانچستەر سیتی و پاریس سانت جێرمان و ئینتەر مەیامی ئەمریکی خواستیان لەسەر گواستنەوەی نیشانداوە.
دیلی ئالی: لە یانەی تۆتنهام هۆتسپێرز پشتگوێخراوە، چەندین یانەی گەورە هەوڵەکانیان بۆ کڕینی دەستپێکردووە، بەتایبەت یانەی پاریس سانت جێرمان ئامادەییان نیشانداوە تەواوی مەرج و داواکارییەکانی جێبەجێبکەن.
کریستیان ئێریکسن: مایسترۆ دانیمارکییەکە چیرۆکی لە ئینتەرمیلان کۆتاییهاتووە، لە تەمەنی 28 ساڵیدا پاڵێوراوە بۆ یاریکردن لە یانەکانی پاریس سانت جێرمان و چەند یانەیەکی دیکەی ئیتاڵیا و ئینگلتەرا.
دیکلان ڕایس: ئەگەرەکانی گەڕانەوەی لە یانەی وێستهام یونایتدەوە بۆ چێڵسی بەهێزە، پێشتر لە ڕیزەکانی بلوزی لەندەن یاریکردووە و جگە لەو یانەیەش، یانەکانی یونایتد و سیتی خواستیان لەسەر کڕینی نیشانداوە.
ئیسکۆ ئالارکۆن: بەهرەدارە ئیسپانییەکە لە پلانەکانی زێدان دوورخراوەتەوە و لەم وەرزەدا پێگە سەرەکییەکەی لەدەستداوە، یانەکانی ئێڤەرتۆن و ئیشبیلیە داوای گواستنەوەیان کردووە.
ئیریک گارسیا: پێشوەخت ڕێککەوتنی لەگەڵ یانەی بەرشلۆنە هەیە، هەموو ئەگەرەکان بەو ئاڕاستەیەن یانەی مانچستەر سیتی بەجێبهێڵێت و بگەڕێتەوە بۆ هەرێمی کەتەلۆنیا.
دیێگۆ کۆستا: بۆندەکەی لەگەڵ ئەتلەتیکۆ مەدرید هەڵوەشاندووەتەوە، گواستنەوەی بۆ هەر یانەیەکی دیکە لە زستانی 2021وە بێبەرانبەرە، تاوەکو ئێستا تەنها یانەی ئارسیناڵ خواستی لەسەر کڕینی نیشانداوە.
