بەیانی ئەمڕۆ لەگەڵ کردنەوەی بازاڕەکانی دراو لە هەرێمی کوردستان و عێراق، نرخی 100 دۆلاری ئەمریکی دابەزیووە بۆ 151 هەزار و 500 دینار.
ئەمڕۆ پێنجشەممە، نرخی دۆلار دابەزینی بەخۆیەوە دیووە بەراورد بە چەند رۆژی رابردوو، نزیکەی هەزار دیناری نرخەکەی لەدەستداوە و بەراورد بە دوێنێ کاتی داخستنی بازاڕیش، 200 دینار کەمی کردووە.
نرخی دۆلار لەناوخۆی عێراق لەژێر کاریگەری چەند فاکتەرێکدایە، خستنەڕووی کاشی بانکی ناوەندی، لێدوانەکانی بانکی ناوەندی عێراق و حکومەتی عێراق لەلایەک و رێککەوتنەکان لەگەڵ بانکە نێودەوڵەتییەکان لەلایەکی دیکە.
دوێنێ چوارشەممە، بانکی نێودەوڵەتیی جیهانی پشتیوانی خۆی بۆ رێکارەکانی حکومەتی عێراق لە پەرەپێدان و نوێکردنەوەی کەرتی بانکی و پەیڕەوکردنی شێوازی پارەدانی ئەلیکترۆنی لە وڵاتەکە راگەیاند.
هەر دوێنێ، یەکێک لە بەڕێوەبەرانی بانکی جی پی مۆرگانی ئەمریکی رایگەیاند، لەگەڵ حکومەت و بانکی ناوەندیی عێراق لە بوارەکانی بانکی و دارایی هەماهەنگی دەکەن و هەژمار بۆ سێ بانکی عێراقی لە بانکەکە دەکەنەوە.
