حکومەتی میسر و چین لە راگەیەندراوێکی هاوبەشدا رایانگەیاند، “لە نزیکەوە بەدواداچوون بۆ پێشهاتەکانی دۆخی دەریای سوور دەکەن و جەخت لەسەر دەستەبەرکردنی سەلامەتی و ئاسایشی کەشتیوانی لەو دەریایەدا دەکەنەوە”.
لە درێژەی راگەیەندراوەکەی حکومەتی قاهیرە و پەکیندا هاتووە، “نیگەرانی خۆیان لە بەرفراوانبوونی ململانێکان لە ناوچەکەدا دەردەبڕن و جەختیان لەسەر گرنگی یەکخستنی هەوڵە نێودەوڵەتی و ناوچەییەکان کردووەتەوە بۆ ئەوەی دەستبەجێ گرژی و ئاڵۆزییەکانی ئەو ناوچەیە رابگیرێت”.
پێشتریش وەزارەتی دەرەوەی میسر جەختی لەسەر ئاگربەستێکی هەمەلایەنە و کۆتاییهێنان بە ئاڵۆزییەکانی کردەوە بۆ ئەوەی ناوچەکە لە هۆکاری زیاتری ناسەقامگیری و ململانێ و هەڕەشەکان بۆ سەر ئاشتی و ئاسایشی نێودەوڵەتی بەدوربێت.
