نەتەوە یەکگرتووەکان ئاماری ساڵی ڕابردووی کۆچبەرانی بڵاوکردەوە، داوای لە ڕێکخراوە نێودەوڵەتییەکان کرد ڕێگری بکەن لە مردن و خنکانی کۆچبەران.
وتەبێژی کۆمسیاری باڵای نەتەوە یەکگرتووەکان بۆ پەنابەران (UNHCR)، شابیا مانتۆ ڕایگەیاند، لە ساڵی ڕابردوودا زیاتر لە سێ هەزار کۆچبەری نایاسایی لە بەشی ناوەڕاست و خۆرئاوای دەریای ناوەڕاست و زەریای ئەتڵەسیدا خنکان و بێ سەروشوێن بوون.
داواشی لە ڕێکخراوە نێودەوڵەتییەکان کرد، پەلە بکەن لە ڕێگریکردن لە مردنی ئەو پەنابەر و کۆچبەرانەی کە ڕێگەی ئاوی وشکانیی زۆر مەترسیدار دەگرنەبەر بۆ گەیشتن بە وڵاتانی ئەوروپا.
بەپێی ئامارەکەی نەتەوە یەکگرتووەکان لە ساڵی ڕابردوودا هەزار و 924 کۆچبەری نایاسایی لە دەریای ناوەڕاست و هەزار و 153ی دیکە کە لە باکووری خۆرئاوای ئەفریقاوە بۆ دوورگەکانی کەناری لەهەوڵی پەڕینەوەدابوون، خنکاون و بێ سەروشوێن بوون.
وتەبێژی نەتەوە یەکگرتووەکان ڕایگەیاند، ساڵی 2020 ژمارەی ئەو پەنابەر و کۆچبەرانەی لە دوو دەریاکەدا خنکاون و بێ سەروشوێن بوون هەزار و 544 کەس بوون، لە سێ مانگی یەکەمی ئەمساڵیشدا 478 کەس لە دەریادا خنکاون و بێ سەروشوێن بوون.
سەبارەت بە هۆکاری زۆریی خنکانی پەنابەران ئاشکرایکردووە، زۆربەی ڕووداوەکانی خنکانی کۆچبەران لە دەریاکاندا بەهۆی زۆر هەڵگرتنی سەرنشینان و بەکارهێنانی بەلەمی کۆن و نەگونجاوەوە ڕوویانداوە، هەروەها بەشێکی زۆری بەلەمەکان بەهۆی نالەباری کەشوهەواوە نوقمی دەریا بوون.
