پارێزگاری هەولێر رایگەیاند، کارئاسانی کراوە و زەمینە خۆشکراوە بۆ ئەوەی 10 نان بکرێت بە هەزار دینار و داشکاندن بۆ نانەواخانە و سەمونخانەکان کراوە لە کارەبا و غاز و ئارددا.
ئومێد خۆشناو پارێزگاری هەولێر لە میانەی کۆنفڕانسێکی رۆژنامەنووسیدا رایگەیاند، ئەوان هەموو میکانیزمەکانیان لێکداوەتەوە و هەنگاوەکانیان گرتووەتەبەر، نانەواخانەکان و سەمونخانەکان 50% داشکاندنی کرێی کارەبایان بۆ کراوە و داشکاندنی 50%ی نرخی غازییان بۆکراوە و هەر فەردەیەک ئاردیشیان بە 29 هەزار دینار پێدەدرێت، لە کاتێکدا نرخی فەردەیەک ئارد بە 34 هەزارە لە بازاڕدا.
ئاماژەی بەوەشکرد، دڵنیایی دەدەن لەوەی چاودێری جۆریەتی ئاردەکە دەکەن و بەرپرسیارییەتییەکەی هەڵدەگرن و هەنگاوەکەش لە پێناو قۆرغکردنی بازاڕە.
لەبارەی گرتنی ئیدریس مەسعودی نانەواوە رایگەیاند، لەلایەن دەزگا ئەمنییەکانەوە بانگکراوە و لێکۆڵینەوەی لەگەڵ کراوە و ئازادکراوە و لەسەر پرسی ئازادی رادەڕبڕین نەبووە.
