كۆمسیۆنی باڵای سەربەخۆی هەڵبژاردنەكان لە بەراوردكردنی دەنگەكان لە نێوان ئەلیكترۆنی و دەستی بەردەوامە و وتەبێژی كۆمسیۆنیش رایدەگەیەنێت، “تائێستا نزیكەی 300 تانە لەئەنجامی هەڵبژاردنی ئەنجومەنی پارێزگاكانی عێراق دراون و هەڵبژاردنی ئەنجومەنی پارێزگاكانی عێراق زۆر بەپاكی و بێگەردی بەڕێوەچووە.
جومانە غلای وتەبێژی كۆمسیۆنی باڵای سەربەخۆی هەڵبژاردنەكانی عێراق بە میدیای فەرمی یەكێتی راگەیاندووە، تائێستا 294 تانە لە ئەنجامی هەڵبژاردنی ئەنجومەنی پارێزگاكانی عێراق دراون و تانەكانیش بەدەست كۆمسیۆنی باڵای سەربەخۆی هەڵبژاردنەكان گەیشتوون، كە بڕیارە لەماوەی 10 رۆژدا بڕ‌یاری لەسەر بدرێت، ئەمەش لەكاتێكدایە ئەنجامی هەڵبژاردنەكە پێویستی بە پەسەندكردنی دادگای فیدراڵی نییە و تەنها پێویستی بە پەسەندكردنی ئەنجومەنی كۆمسیارانە”.
وتیشی، “تائێستا سەرجەم رێكارەكان و بەراوردكردنی دەنگەكان لە نێوان ژماردنی ئەلیكترۆنی و دەستی زۆرباش بەڕێوەچووە و هەمووان شایەتی لەسەر پاك و بێگەردی هەڵبژاردنی ئەنجومەنی پارێزگاكانی عێراق بەپێی بنەما نێودەوڵەتییەكان دەدەن، بەڵام هەمیشە ئەو حزب و لایەنانەی براوە نابن، ئەنجامەكانیان پێ قبووڵناكرێت، ئەمەش حاڵەتێكی ئاساییە”، جومانە غلای وای وت.
