لەگەڵ بەردەوامی دابەزینی بەهای دۆلار لەبەرامبەر دینار، باڵیۆزی ئەمریکا لە عێراق جەخت لە بەردەوامی ناردنی دۆلار بۆ وڵاتەکە دەکاتەوە.
ئەلینا رۆمانۆسکی باڵیۆزی ئەمریکا لە عێراق لە پەیامێکدا رایگەیاند، “بۆ یەکەمجار بانکە عێراقییەکان دەستیان بە دروستکردنی پەیوەندی لەگەڵ بانکە نێودەوڵەتییەکان کردووە، ئەمەش هەنگاوێکی باشە بۆ پێشکەوتن و چاکسازی لە کەرتی بانکیدا”.
ئاماژەی بەوەشکرد، “لەپێناو بەدیهێنانی سەقامگیریی ئابووری، بەردەوام دەبین لە پێشکەشکردنی دۆلاری ئەمریکی”.
ئەمە لە کاتێکدایە، ماوەی زیاتر لە هەفتەیەکە دۆلاری ئەمریکی بەرامبەر بە دیناری عێراقی دابەزینی زیاتری بەخۆیەوە بینیوە و ئومێدی چارەسەری قەیرانی دۆلار هەیە کە ماوەی چەند مانگێکە لە عێراق بەردەوامە .
