کۆمپانیای ژاپۆنی سۆنی رایگەیاند، بەهۆی بڵاوکردنەوەی زنجیرەیەک یاری زۆر بەناوبانگەوە، فرۆشی PS5 گەیشتووەتە 50 ملیۆن دانە”.
سۆنی لە بەیاننامەیەکدا ئاماژەی بەوەکردووە، “بەهۆی پشتگیری هەوادارانی پلەیستەیشن لە سەرانسەری جیهان و بڵاوکردنەوەی زنجیرەیەک یاری زۆر بەناوبانگ، فرۆشتنی پلەیستەیشن پێنج ئاستێکی پێوانەی تۆمارکردووە و 50 ملیۆن دانەی لێ فرۆشراوە”.
ئەو کۆمپانیا ژاپۆنییە جەختلەوەش دەکاتەوە بەهۆی پشتگیرییان لە یارییە سەرکەوتووەکانی وەک “Marvel’s Spider-Man 2” کە لە ماوەی 24 کاتژمێردا دوای بڵاوبوونەوەی زیاتر لە 2.5 ملیۆن دانەی لێ فرۆشرا لەگەڵ “Balders’ Gate 3” و “Now Wake 2″، فرۆشی ئەو مۆدێلەی پلەیستەیشن زیادیکردووە.
پێشتر PS2 وەک پڕفرۆشترین کۆنسۆڵی سۆنی دەستنیشانکرا بەوپێیە زیاتر لە 155 ملیۆن دانەی لێ فرۆشرا، هاوکات PS4 پلەی دووەمی گرتووە و 117 ملیۆن دانەی تێپەڕاندووە.
PS5 لە مانگی تشرینی دووەمی ساڵی 2020 خرایە بازاڕەوە کە جیهان بەدەست پەتای کۆرۆناوە دەیناڵاند، هاوکات لە سەرەتادا فرۆشتنی ئەو مۆدێلەی پلەیستەیشن بەهۆی کەمیی چیپ و چەندین کێشەی دیکەوە لە جیهاندا زیانی پێگەیشت.
لە دوای بڵاوکردنەوەی یەکەم پلەیستەیشن لە ساڵی 1994 کۆمپانیای سۆنی گەشەی کردووە و بەپێی راپۆرتێکی کۆمپانیای ڕاوێژکاری پیشەسازی نیوزۆوە داهاتی ئەمساڵی بە زیاتر لە 53 ملیار دۆلاری ئەمریکی مەزەندە دەکرێت.
