هەریەك لە ویلایەتە یەكگرتووەكانی ئەمریكا و عێراق هۆشداریانداوەتە ئێران و ئەو گروپە چەكدارییانەی پشتیوانییان دەكات، بەڵێنی وەڵامی خێرای هەر هێرشێكیش دراوە كە دیپلۆماتكار و هێزە سەربازییەكانی ئەمریكا بكاتە ئامانج.
ڕۆژنامەی وۆل ستریت جۆرناڵ بڵاویكردەوە، هۆشدارییەكە هاوكاتە لەگەڵ نزیكبوونەوەی یەكەمین ساڵیادی كوشتنی قاسم سولەیمانی، فەرماندەی پێشووی فەیلەقی قودس و ئەبومەهدی موهەندیس، جێگری پێشووی سەرۆكی دەستەی حەشدی شەعبی كە لە 3ی كانونی دووەمی 2020 لە هێرشێكی فڕۆكە سەربازییەكانی ئەمریكا لە نزیك فڕۆكەخانەی بەغداد كوژران.
فرانك ماكینزی، فەرماندەی سەربازیی هێزەكانی ئەمریكا لە ڕۆژهەڵاتی ناوەڕاست وتی، ناكرێت كەس لە توانای بەرگریی هێزەكانمان كەمبكاتەوە یان هەڵسوكەوتی یەكلاكەرەوە بكات بۆ وەڵامدانەوەی هەر هێرشێك.
پاش بە ئامانجگرتنی باڵیۆزخانەی ئەمریكا لە مانگی ڕابردوو، مستەفا كازمی، سەرۆكوەزیرانی عێراق شاندێكی ڕەوانەی تاران كرد.
شاندەكە پەیامێكی هۆشداریی دایە تاران لەوەی واشنتن بەرپرسیارێتی هەر هێرشێك كە بەرژەوەندییەكانی بگرێتەوە دەخاتە ئەستۆی ئەو وڵاتە.
