مستەفا کازمی سەرۆک وەزیرانی عێراق گەیشتە ئێران، سەردانەکەی کازمی لەسەر بانگهێشتی سەرۆک کۆماری ئەو وڵاتە بووە و پرسەكانی ئاسایش و وزە و پەیوەندییەكانی نێوان تاران و ڕیاز تاوتوێدەكەن.
مستەفا کازمی بە سەرۆکایەتیی شاندێکی باڵای عێراق و لەسەر بانگهێشتی ئیبراهیم ڕەئیسی گەیشتە تاران، بەپێی لێدوانی کازمیش، مەبەستی سەردانەکەی بەهێزکردنی پەیوەندییەکانی نێوانیانە.
لە ڕاگەیەندراوی نوسینگەی مستەفا کازمیدا هاتووە، “ئامانجی سەردانەکەی سەرۆک وەزیران بۆ بەهێزکردنی پەیوەندییەکانی نێوان هەردوولا و کردنەوەی دەرگای هەماهەنگییە لە سەرجەم بوارەکاندا، هەروەها گرنگیدان بە پەیوەندییەکی بەهێزی نێوان هەردوو وڵات”.
نوسینگەكەی كازمی دەشڵێت، “عێراق سەرکەوتووبووە لەوەی ڕۆڵی ئەرێنی هەبێت لە ناوچەکە و پەرەپێدانی پەیوەندییە ستراتیژییەکانی لەگەڵ وڵاتانی دەوروبەر، هەروەها پابەندبوون بە بنەماکانی سەقامگیریی لەپێناو پاراستنی ئاسایشی ناوچەکە”.
ئاماژە بەوەشکراوە، کازمی لەگەڵ بەرپرسانی باڵای ئێران کۆدەبێتەوە و گفتوگۆی پرسە گرنگە هاوبەشەکانی نێوان هەردوو وڵات دەکرێت، بە لەبەرچاوگرتنی بەرژەوەندییەکانی هەردوولا و پاڵپشتیکردنی پاراستنی ئاسایشی ناوچەکە.
لایەنی ئێرانیش لەبارەی تەوەرەكانی گفتوگۆی سەردانەكەوە ئاشكرایكردبوو، پرسەكانی وزە و ئاو، ئاسایشی ناوچەكە و هەروەها پەیوەندییەكانی نێوان ئێران و سعودیە تاوتوێدەكرێن، كە عێراق لەم پرسەی دواییدا ڕۆڵی نێوەندگێڕ دەبینێت.
